„Þetta var mjög svekkjandi. Mjög fúlt og erfitt og situr í fólki, en við verðum að horfa á þetta í heildina og getum sjálfum okkur kennt,“ sagði Ólafur Guðbjörnsson, annar þjálfara Stjörnunnar, eftir 2-1 tap liðsins gegn Breiðablik í Pepsi deild kvenna í kvöld.
„Við vorum sterkari í seinni hluta fyrri hálfleiks eftir að við jöfnuðum og hefðum viljað fá meira úr þeim tíma.“
Hann viðurkennir að eitt stig úr þessum leik hefði getað breytt talsverðu hvað varðar stöðu liðsins í deildinni, en Breiðablik skoraði sigurmark sitt í uppbótartíma.
„Stigið hefði haldið okkur nær Breiðablik og þessum liðum á toppnum en við verðum bara að fá þessi þrjú stig annars staðar,“ sagði Ólafur. Viðtalið má sjá í heild sinni hér að ofan.
