Guðni Rúnar Helgason aðstoðarþjálfari Völsungs hefur skipt yfir í liðið.
Hann sagði í samtali við Fótbolta.net að hann ætti ekki von á því að spila mikið en hann ætlaði að loka hringnum.
,,Ég á nú ekki von á því að spila mikið, kannski fimm mínútur til að loka hringnum," sagði Guðni Rúnar í samtali við Fótbolta.net.
Guðni Rúnar þekkir til með Völsungi eftir að hafa leikið með liðinu í nokkur ár á sínum tíma en hann var síðast með liðinu árið 1998.
Á ferlinum hefur Guðni einnig leikið með KR, Val, Fylki og ÍBV hér á landi, Start og Hönefoss í Noregi auk þess sem að hann var á mála hjá Sunderland á Englandi á sínum tíma.
Hann lék síðustu tvö tímabil með Stjörnunni en fór frá félaginu eftir síðustu leiktíð.
