Heimild: AP
Knattspyrnusamband Evrópu, UEFA, hefur hafnað áfrýjun spænska félagsins Mallorca um að spila í Evrópudeildinni á komandi leiktíð.
Ákvörðun þessa efnis var tekin í gær þar sem Mallorca uppfyllti ekki skilyrði í reglum sambandsins, þrátt fyrir að spænska knattspyrnusambandið hafi gefið félaginu leyfi til að spila í Evrópudeildinni fyrir sitt leyti.
Mallorca getur áfrýjað ákvörðun UEFA til gerðardóms en félagið hafði unnið sér sæti í Evrópudeildinni með því að enda í fimmta sæti spænsku deildarinnar.
Félagið ákvað svo að fara í greiðslustöðvun vegna 60 milljón evra skulda sinna og það verður til þess að þeir missa af sætinu.
Villarreal sem endaði í sjöunda sætinu tekur sæti Mallorca í Evrópudeildinni en Getafe sem endaði í sjötta sætinu fer líka í pottinn þegar drátturinn fer fram á föstudag.
