Blikar einfaldlega miklu betri í dag. Virtust ögn brothættir varnarlega í fyrri hálfleiknum í stöðunni 0-0 en eftir að þeir náðu inn marki var ekki spurt að leikslokum.

Mark Jonathans Glenn. Það var kominn pirringur í menn og þá vantaði markið fyrir hálfleik. Að auki mikilvægt fyrir hann og liðið að hann sé kominn á blað. Var ógnandi í framlínunni og gefur þeim kraft. Að sama skapi var Ellert Hreinsson sem hefur verið misjafn frammi hjá þeim í sumar góður á hægri kantinum í dag.

Blikar halda í við toppbaráttuliðin og úrslitin í leikjum þeirra urðu þeim hliðholl í kvöld. Tap Valsara og KR-inga koma sér vel fyrir þá. Á sama tíma gera Keflvíkingar ekkert til að sannfæra okkur um það að þeir spili í Pepsi-deildinni að ári.

Alexander Magnússon mætti Kristni Jónssyni í stuði í dag. Hann fékk marga bolta yfir sig þ.á.m. í tveimur mörkum og sá í raun aldrei til sólar. Aðrir slakir í Keflavík í dag, sem dæmi hinn bakvörðurinn Magnús Þórir Matthíasson.

Garðar Örn Hinriksson þurfti lítið að hafa fyrir því að dæma þennan leik í dag. Lítið um vafaatriði og gekk heilt yfir ágætlega. Vissir 50/50 dómar inn á milli sem hefðu e.t.v. mátt sleppa eða fara í hina áttina.