Aukaspyrnumark Steven Lennon var það eina sem réði úrslitum hér í kvöld. FH-ingar voru mikið meira með boltann og sköpuðu sér einhver færi í upphafi hálfleikanna en meira var það ekki. Fylkismenn lágu til baka mest allan leikinn og virtust vera komnir til að verja stigið. Þeir fáu spilkaflar sem þeir náðu upp enduðu undantekningalaust á vondri sendingu á mótherjann.

Aukaspyrna Lennon. Hann fékk aukaspyrnuna og tók hana sjálfur og afgreiddi snyrtilega í nærhornið, yfir varnarvegg Fylkis.

FH-ingar eru áfram á toppnum eftir þriðja 1-0 sigurinn í röð en Fylkismenn sitja áfram á botninum með aðeins tvö stig í átta leikjum.

Þetta var ekki góður dagur fyrir Pepsi-deildina. Líklega er ósanngjarnt að spila í miðju Evrópumóti og samanburðurinn erfiður, en maður ætlast til þess að lið eins og FH sýni meira gegn botnliði Fylkis.

Reyndi ekki mikið á Valdimar en virtist vera með stóru atriðin nokkuð á hreinu.