Fylkir byrjaði leikinn mun betur og náði góðum tökum á honum í fyrri hálfleik. Það losnaði aðeins um tökin í síðari hálfleik þegar Grindavíkurliðið náði betri takti en gestirnir voru alltof seinar í gang og gerðu einfaldlega ekki nóg til að fá eitthvað út úr leiknum gegn baráttuglöðu Fylkisliði.

Stoðsendingin í eina marki leiksins var stórkostleg. Hægri kantmaðurinn Kristín Þóra stakk boltanum utanfótar á milli varnarmanna Grindavíkur og hárnákvæmt fyrir fæturnar á Jasmín Erlu sem skoraði auðveldlega.

Fylkisliðið ætlar sér að afsanna spár um slæmt gengi í sumar og stimplar sig inn í deildina með sigri. Nýliðar Grindavíkur eiga helling inni en lykilmenn þurfa að sýna meira ef liðið ætlar ekki að lenda í veseni.

Nýju útlendingarnir í Grindavíkurliðinu voru alltof lengi í gang og þurfa að gera betur í sumar. Þær stigu upp í seinni hálfleik og sýndu að það býr ýmislegt í þeim en eins og Róbert þjálfari sagði í viðtali eftir leik þá er ekki nóg að hafa hæfileikana heldur þarf líka að hafa fyrir hlutunum.

Spurning hvort að Bríet hefði átt að reka Guðrúnu Bentínu útaf fyrir ljótt brot í fyrri hálfleik. Annars fín frammistaða hjá dómurunum og ekkert stórvægilegt fyrir liðin að kvarta yfir.