KR var einfaldlega sterkari aðilinn í leiknum. Síðan skemmir ekki fyrir að hafa leikmann eins og Óskar Örn Hauksson í liðinu. Hann getur búið til mark upp úr engu eins og hann gerði í kvöld.

Skagamenn fengu umdeilda vítaspyrnu undir lokin og minnkuðu muninn. Fram að því höfðu þeir lítið ógnað sóknarlega. Markið gaf ÍA kraft og áhorfendur fengu spennandi lokamínútur eftir að KR virtist ætla að sigla öruggum sigri í höfn.

KR-ingar eru búnir að vinna tvo leiki í röð eftir óvænt tap á heimavelli í fyrstu umferð. ÍA er án stiga eftir þrjá leiki. Skagamenn hafa líka byrjað illa undanfarin tvö tímabil. Ná þeir að rífa sig aftur upp í ár?

Miðvörðurinn ungi Hafþór Pétursson varð fyrri því óláni að skora sjálfsmark í fyrri hálfleik. Rauk út úr vörninni í síðara markinu og lét Óskar Örn labba framhjá sér þar.

Hinn efnilegi Helgi Mikael hafði fín tök á leiknum lengst af. Vítaspyrnudómurinn var umdeildur og að mínu mati rangur. Stefán Logi náði að kýla boltann áður en hann og Albert skella saman.