Í leik þar sem færin voru ótrúlega mörg þá náðu Valsarar að skora fleiri mörk. Vítaspyrnuklúður Óskars Arnar Haukssonar reyndist dýrkeypt þegar upp var staðið auk þess sem Anton Ari Einarsson varði tvívegis úr dauðafærum hjá Kennie Chopart í fyrri hálfleiknum.

Fyrra mark Valsmanna kom þvert gegn gangi leiksins í byrjun. KR-ingar höfðu verið sterkari fyrsta korterið þegar Valur skoraði eftir langt innkast. Það mark átti eftir að reynast drjúgt.

Valsmenn halda áfram á flugi og eru jafnir Stjörnunni á toppnum með tíu stig. KR-ingar eru með sex stig og eiga svakalegan leik framundan gegn FH í Vesturbænum í næstu viku.

Óskar Örn á eftir að naga sig í handarbökin eftir vítaspyrnuklúðrið í fyrri hálfleiknum. Þrátt fyrir að vera í sigurliði þá er Kristinn Ingi Halldórsson einnig til umræðu hér. Kristinn á eflaust eftir að hugsa eitthvað um tvö rosaleg færi sem hann fékk áður en hann leggst á koddann í kvöld.

Fyrri vítaspyrnudómurinn var nokkuð ódýr hjá Þóroddi auk þess sem hann sleppti tveimur gulum spjöldum í fyrri hálfleik eftir að hafa beitt hagnaðarreglunni. Annars fín frammistaða hjá Norðanmanninum.