Fjölnismenn mættu óhræddir í Kaplakrikann að þessu sinni. Oft hefur litið út sem þeir hafi ekki haft trú á því að þeir geti unnið FH en að þessu sinni var annað uppi á teningnum.

Jón Ragnar átti í vandræðum og klaufalegt brot hans á Binna bolta færði Fjölni aukaspyrnu sem þeir nýttu til að skora sigurmarkið.

Ágúst Gylfason heldur áfram að svara efasemdarröddum. Eftir hikstandi byrjun unnu Grafarvogsmenn hrikalega öflugan sigur í Krikanum. FH-ingar eru í brasi, fimm stig eftir fjóra leiki er algjörlega út úr karakter og skyndilega eru þeir í því hlutverki að elta efstu lið.

Íslandsmeistararnir fundu alls ekki taktinn í dag. Í seinni hálfleik kom 20 mínútna fínn kafli fyrir markið þeirra en annars afskaplega vond vika fyrir FH-inga, ósigurinn í handboltanum í gær ekki að hjálpa. Sá sem ég tek fyrir úr þessum leik er Jón Ragnar Jónsson sem var í gríðarlegu basli eftir að hafa komið inn fyrir meiddan Jonathan Hendrickx. Binni bolti fór oft illa með hann.

Þorvaldur Árnason var besti dómarinn 2016 og hann rúllaði upp þessu verkefni í kvöld.