Það er virkilega sterkt að skora þrjú mörk eftir föst leikatriði og áttu þau stóran þátt í sigri Vals. Það er nú samt þannig að jafnvel án þeirra hefði Valur unnið þægilegan sigur. Liðið var einfaldlega miklu betra í kvöld og sigurinn síst of stór.

Það eru nokkur atvik sem koma til greina. Til að mynda mistökin hennar Emmu, vítið og markið sem Grindavík fékk á sig strax eftir að hafa minnkað muninn. Ég ætla hinsvegar að henda þessu á Katrínu Gylfadóttur sem átti flottustu tilþrif leiksins örstuttu eftir að hafa komið inná sem varamaður. Hún tók nettan "Zidane" snúning og kom sér í færi eftir samleik við Elínu Mettu. Færið kláraði hún reyndar ekki en hún stimplaði sig skemmtilega inn í mótið.

Tveir sigrar í röð og fullt af mörkum hljóta að gefa Valskonum sjálfstraust eftir erfiða byrjun. Þær komast upp í 5. sæti með sigrinum og bæta markatöluna sína. Grindavíkurliðið er í öðrum sporum en eftir ágæta byrjun hefur hallað undan fæti og liðið nú tapað heldur stórt í þremur leikjum í röð. Þær sitja þó áfram í 7. sæti með Fylki, KR og Hauka fyrir neðan sig.

Emma Higgins gerði hrikaleg mistök á slæmum tíma í markinu hjá Grindavík. Einu marki undir voru Grindvíkingar ennþá inni í leiknum en svo gaf Emma Val mark númer tvö á silfurfati og þá var róðurinn orðinn ansi þungur fyrir gestina. Emma fékk þá sendingu til baka og var alltof lengi að losa sig við boltann. Margrét Lára pressaði vel á hana, vann boltann og þakkaði pent fyrir með marki. Sjaldséð mistök hjá þessum reynslumikla markverði.

Solid frammistaða hjá tríóinu. Ekki yfir neinu stóru að kvarta en það hefði mögulega mátt flauta nokkrar aukaspyrnur til viðbótar og lyfta eins og einu spjaldi.