Eftir tíðindalítinn fyrri hálfleik byrjuðu KA menn þann seinni af gífurlegum krafti og voru komnir með 2 marka forskot eftir korters leik í seinni hálfleik. KA menn voru mun sterkari og í rauninni með unnin leik í höndunum þangað til Bjarki Þór ver boltann á línu með hendinni og fær rautt spjald. Vikingar minnka muninn og eru manni fleiri síðasta korterið. Gestirnir voru mun sterkari aðilinn eftir rauða spjald Bjarka og ná inn jöfnunarmarkinu í blálokin og uppskera 1 punkt.

Rauða spjaldið og vítaspyrnudómurinn. KA menn virtust vera að sigla heim nokkuð þægilegum 3 stigum þangað til Bjarki ver með hendi á línu og uppsker rautt spjald. Víkingar skora og KA menn sem höfðu verið frábærir fram að þessu í seinni hálfleik misstu móðinn. Víkingar efldust klárlega eftir þetta atvik og náðu að lokum að jafna metin og sækja stigið.

Úrslitin þýða það að annan leikinn í röð ná KA menn ekki að halda út og fá á sig mark í blálokin. KA eru enn í þriðja sæti eftir úrslit dagsins og munu klárlega líta á þetta sem tvö töpuð stig. Víkingar sýndu hins vegar karakter með því að koma til baka og geta verið sáttir með 1 stig úr því sem komið var.

Bjarki Þór Viðarsson. Var búinn að vera inni á vellinum í 4 mínútur þar til hann fékk dæmda á sig vítaspyrnu og var rekinn útaf.

Stóð sig með prýði í dag.