Skipulag HK réði úrslitum í dag. Liðið var agað á miðjunni og varnarlega. Fyrsta skiptið í sumar sem liðið heldur hreinu og í raun allt jákvætt sem liðið getur tekið úr leiknum. Þegar ÍR-ingar sóttu sem mest undir lokin tókst liðinu að standast pressuna og landa þægilegum sigri. Árni Arnarson var búinn að vera frábær á miðjunni áður en hann fór meiddur af velli og var spurning hvernig Grétar myndi leysa það verkefni. Hann gerði það vel og HK-ingar fagna þessu. ÍR-ingar voru undir í allri baráttu og áttu mjög erfitt með að finna sig í þessum leik.

Styrmir Erlendsson fékk rautt spjald á lokamínútunni fyrir að sparka í bakið á Gumma Júl. Styrmir kom inn sem varamaður undir lok leiksins.

HK-ingar eru komnir með sjálfstraust. Virkilega öflugur liðsandi í liðinu og taka vel við sér eftir tapið gegn Haukum. Þetta er auðvitað vont fyrir ÍR sem er í botnbaráttunni og annar leikurinn í röð þar sem liðið tapar með tveggja marka mun. ÍR-ingar sáu engin svæði laus og áttu mjög erfitt með að opna HK-inga, þannig ÍR-ingar vilja laga það sem fyrst.

Jón Gísli Ström var týndur í dag. Það var enginn að skapa neitt af viti fyrir hann. Alger lykilmaður í ÍR en sást því miður lítið sem ekkert. Már Viðarsson átti heldur ekki sinn besta dag. Missti boltann í fyrra markinu þarna á Ásgeir Marteins.

Fín dómgæsla og ekkert út á hana að setja svona þannig lagað.