Eyjamenn nýttu færin mun betur en Stjarnan. Stjörnumenn sóttu meira allan leikinn og fengu fín færi sem ekki nýttust. ÍBV, með Kaj Leó í Bartalsstovu í broddi fylkingar, refsaði í síðari hálfleiknum.

Sigurmarkið hjá Kaj Leó. Stjarnan hafði sótt stíft þegar Eyjamenn unnu boltann og refsuðu. Sindri Snær átti frábæra sendingu yfir fáliðaða vörn Stjörnunnar. Kaj Leó fékk boltann vinstra megin og þrumaði í fjærhornið. Glæsileg skyndisókn.

ÍBV fer í bikarúrslitin annað árið í röð en Stjarnan er úr leik.

Jósef Kristinn Jósfesson var ógnandi í vinstri bakverðinum eins og vanalega. Hann er hins vegar örugglega ekki sáttur með sjálfan sig að hafa ekki náð að skora eftir að hafa fengið nokkur fín færi í leiknum. Auk þess náði hann ekki að stöðva Kaj Leó á sprettinum í fyrra markinu.

Stjörnumenn eru ósáttir við að hafa ekki fengið vítaspyrnu í fyrri hálfleik þegar Jónas Þór Næs tæklaði Jósef. Höfðu mögulega eitthvað til síns máls þar. Annars hafði Pétur ágætis tök á leiknum.