Blikar spiluðu vel í fyrri hálfleik, héldu boltanum, stjórnuðu spilinu, komu sér í færi og áttu fjölmargar marktilraunir. Þeir skora sem skjóta. Seinni hálfleikurinn var jafnari en mörkin 2 úr fyrri hálfleiknum dugðu, ekki síst fyrir tilstilli Sonnýjar í markinu sem átti virkilega mikilvæga vörslu á 74. mínútu þar sem Fylkisstúlkur hefðu getað komist á bragðið.

Vítaspyrnudómurinn í fyrri hálfleiknum. Vafasamur. Og ef rangur, mjög dýr fyrir Fylki. Get líka nefnt hérna markið sem var dæmt af Fylki á 83. mínútu. Ég sá það samt ekki nægilega vel til að dæma um það.

Fylkir er í verulega vondum málum, í fallsæti og 7 stigum frá KR þegar aðeins 5 umferðir eru eftir. Lyktin af falli er farin að berast um Lautina! Breiðablik kemur sér í 2. sæti deildarinnar um sinn, en það getur breyst annað kvöld. En virkilega mikilvægur sigur fyrir þær eftir 2 töp í röð.

Sóknartilburðir Fylkis. Ég hefði búist við því að sjá aðeins meiri ákafa og kraft í sóknarleik liðs sem er að berjast fyrir sæti sínu í deildinni. Kaitlyn átti nokkra fína spretti en hún var svolítið ein oft á tíðum. Hermann þjálfari Fylkis notaði allar 3 skiptingarnar sínar nokkuð snemma í leiknum, væntanlega til að reyna að hressa upp á sóknarleikinn en það dugði ekki til. Hulda sást ekkert meira í seinni hálfleiknum heldur en Thelma hafði gert í þeim fyrri. ída átti nokkra góða spretti og er greinilega efnilegur leikmaður, en hún á enn eitthvað í land með að ná líkamlegum styrk til að spila gegn varnarmönnum á meistaraflokksaldri, sem er auðvitað bara eðlilegt fyrir leikmann sem er fæddur 2002. En heilt yfir voru vonbrigði að sjá ekki betri tilburði en þetta fram á við og byggt á þessum leik er erfitt að sjá fyrir sér hvernig þær fóru að því að setja 3 mörk á topplið Þórs/KA fyrir norðan í síðustu viku.

Ég ætla að halda mig við að þessi vítaspyrnudómur hafi verið harður í meira lagi og gefa einkunn út frá því. Einnig fannst mér Einar dæma nokkrar mjög "soft" aukaspyrnur í leiknum. Svo er spurning með markið sem dæmt var af Fylki undir lokin.