Ætli munurinn á atvinnumönnum og hálf-atvinnumönnum hafi ekki sést í þessum leik. FH stóð í Braga lungan úr leiknum en við minnstu mistök var þeim refsað.

Eftir rúmlega 10 mínútna leik þurfti Ahmed Hassan að fara af velli eftir að hafa meiðst inn í vítateig FH. Hann skallaði yfir mark FH og fékk í kjölfarið að mér sýndist spark frá Davíð Þór í hausinn, en Davíð var of seinn í boltann. Dómari leiksins dæmdi hinsvegar einungis markspyrnu og ég held að Davíð Þór og fleiri FH-ingar hafi andað léttar með það.

FH-ingar eru í erfiðri stöðu fyrir seinni leikinn. Þeir þurfa alltaf að skora að lágmarki tvö mörk í Portúgal til að komast áfram. Brekkan er brött, brattari en brekkan í Herjólfsdal á mánudegi eftir rigningarmikla Þjóðhátíðarhelgi.

Gunnar Nielsen og Emil Pálsson hljóta að svekkja sig á koddanum í kvöld. Ég hefði viljað sjá Gunnar gera betur í að minnsta kosti fyrra markinu og síðan tapaði Emil boltanum á stórhættulegum stað í aðdraganda seinna marksins. Mistök sem þér er refsað fyrir í Evrópukeppni.

Allt í lagi, ekki gott.