Agaður varnarleikur og markviss sóknarleikur ÍR-inga er það sem skildi liðin að. Hægt var að telja færi Gróttu á annarri hendi og liðið virkaði fremur sálarlaust og virtist ekkert líf í þeirra leik. Vítaspyrnan sem liðið fékk á sig undir lok fyrri hálfleiks tók verulega á liðið og ÍR-ingar gerðu svo breytingu í hálfleik sem skipti sköpum er Sergine Modou Fall kom inn. Hann var sífellt að ógna marki gestanna og tókst heimamönnum að gera tvö mörk til viðbótar. Grótta virtist vera búið að pakka í töskur og sætta sig við fall og þegar lagt er gróft mat á liðið þá virðist það á leið niður.

Vítaspyrnan sem ÍR fær undir lok fyrri hálfleiks breytti öllu. Alexander Kostic handlék knöttinn og virtist hann mótmæla því. Þórhallur Dan, þjálfari Gróttu, var þó sammála dómnum.

ÍR er að skrá sig úr botnbaráttu með þessum sigri og er nú sjö stigum frá Gróttu. Það eru vissulega fimm erfiðir leikir eftir en það þarf bókstaflega allt að gerast til þess að ÍR skrái sig aftur í þessa baráttu. Grótta leit illa út í dag og er mjög erfitt að sjá liðið vinna sig út úr þessu.

Stefán Ari í marki Gróttu var oft úti á þekju í þessu svokallaða sweeper-keeper kerfi. Fór oft út í ævintýraleg skógarhlaup. Varnarlína Gróttu hélt illa skipulagi og opnuðu sig of mikið. Sóknarleikurinn var ekkert betri og menn hugmyndasnauðir.

Dæmdi þetta vel og ekkert út á hann að setja. Hélt línu vel.