Lagleg mörk hjá Igor Jugovic tryggðu Fjölni sigurinn í kvöld. Igor hafði ekki skorað í Pepsi-deildinni í sumar en hann valdi rétta tímapunktinn til að opna markareikninginn. Fjölnismenn voru ofan í baráttunni og viljinn hjá Grafarvogsliðinu var mun meiri en í síðustu leikjum. Þrjú dýrmæt stig í botnbaráttunni.

Gleðin var ósvikin hjá Igor Jugovic og Fjölnismönnum þegar sigurmarkið leit dagins ljós. Igor reif sig úr að ofan og fagnaði með liðsfélögum sínum við varamannabekkinn. Risastórt mark sem fer langt með að gulltryggja sæti Fjölnis í deildinni að ári.

Fjölnir hefur unnið báða leikina gegn FH í sumar og náð í 25% stiga sinna gegn Fimleikafélaginu! Fjölnir steig með sigrinum mjög stórt skref í átt að öruggu sæti í deildinni. Fjölnir er nú fjórum stigum frá fallsvæðinu þegar tvær umferðir eru eftir. FH þarf ennþá einn sigur til viðbótar til að tryggja Evrópusætið. FH er í 3. sæti deildarinnar, stigi á eftir Stjörnunni en fjórum stigum á undan KR.

Gunnar Nielsen, markvörður FH, gerði sig sekan um slæm mistök í fyrsta markinu og var í miklu basli með úthlaup sín eftir það. Gunnar átti misheppnaða spyrnu fram völlinn í byrjun síðari hálfleiks og Igor Jugovic refsaði með því að skora með skoti af 40 metra færi. Gunnar myndi eflaust spyrna boltanum út af ef hann mætti leika atvikið aftur núna.

Pétur hélt spjöldunum niðri lengi vel en dró þau síðan upp þegar á þurfti að halda. Átti heilt yfir fínan dag.