Maður hefur svo oft séð litla liðið standa í því stóra í fyrri hálfleik en svo þegar líður á leikinn fer loftið úr blöðrunni. Grindavík fór inn í hálfleik í stöðunni 1-1 og innkoma portúgölsku landsliðskonunnar Carolina Mendes blés þeim enn meiri byr undir vængina og það var áfram kraftur í liðinu. Reyndar var ótrúlega gaman að sjá lið sem hefur ekki að neinu að keppa leggja eins mikið í einn leik. Þær hentu sér fyrir alla bolta í 90 mínútur og uppskáru eftir því.

Stóra atvikið sem allir voru að tala um þegar ég mætti í Grindavík var hvort spila ætti leikinn eða ekki útaf aðstæðum, rok, rigning og gegnblautur völlur. Grindvíkingar voru búnir að panta Reykjaneshöll til vara en fengu álit dómara í morgun þess efnis að ekkert væri að aðstæðum. Halldór Jón Sigurðsson þjálfari Þórs/KA var ósáttur við þetta og kannski sat það of mikið í honum í dag í stað þess að sætta sig við ákvörðun dómara. Fótboltaleikir hafa oft verið spilaðir við miklu verri aðstæður hér á landi og við verðum að lifa með haustlægðunum. Vissulega var grasið blautt en aldrei sá maður vindinn stela boltanum í skotum eða sendingum.

Þór/KA gat með sigri tryggt sér Íslandsmeistaratitilinn í dag en þó svo liðið hafi verið besta lið deildarinnar í sumar þá þurfa þær að bíða eftir því að tryggja sér Íslandsmeistaratitilinn þar til í lokaumferðinni en til þess verða þær að vinna FH eða treysta á að Grindavík taki stig af Breiðabliki.

Það verður ekkert spes rútuferð hjá Þórs/KA liðinu heim í dag. Þær mættu til Grindavíkur til að verða Íslandsmeistarar en fara tómhentar heim eftir að hafa ekki staðið sig vel í dag. Við væntum meira af Íslandsmeistaraliði og höfum áður séð lið vera á toppnum lengi en missa taktinn á úrslitastundu og klúðra málum. Þór/KA verður að mæta miklu ákveðnara til leiks gegn FH á fimmtudaginn ef þær ætla ekki að tapa titlinum til Breiðabliks. Það er í alvöru hætta á því.

Réði vel við leikinn og tók rétta ákvörðun að láta spila í dag.