Færanýting Breiðabliks réði úrslitum. Eins og svo oft áður í sumar hélt Stjarnan boltanum ágætlega innan liðs en náði hvorki að skapa sér mörg færi né skora mörk. Blikar sköpuðu sér minna en nýttu meira. Berglind Björg kom þeim óvænt yfir í fyrri hálfleik og gulltryggði sigurinn með marki eftir horn í þeim seinni.

Mörkin tvö eru það sem stendur upp úr. Hvort það að komast óvænt yfir í fyrri hálfleik eða loka leiknum í þeim seinni vegi þyngra er spurning. Höfum atvikin bara tvö að þessu sinni. Berglind Björg konan á bakvið þau bæði.

Breiðablik er öruggt um 2. sæti deildarinnar þar sem að Valur tapaði fyrir FH. Þá tapaði topplið Þórs/KA einnig og Blikar eiga því tölfræðilega möguleika á titli fyrir lokaumferðina. Eitthvað sem fáir hefðu giskað á miðað við hvernig mótið hefur spilast.

Þetta sumar hefur verið stöngin út fyrir Stjörnuna sem þurfti að sætta sig við enn eitt tapið. Hrikalega vondur dagur fyrir liðið í heild sinni. Þá var þetta skrítinn dagur fyrir Lorina White sem var mjög öflug í fyrri hálfleik en missti dampinn algjörlega í þeim síðari. Var étin í seinna marki Breiðabliks og líklega heppin að hanga inná þegar hún braut heldur harkalega af sér á gulu spjaldi. Þá tókst þeim Kolbrúnu Tinnu og Viktoríu Valdísi ekki að sýna sínar bestu hliðar þegar þær fengu langþráð tækifæri í byrjunarliði.

Var með allt þetta mikilvægasta á hreinu en missti af nokkrum brotum úti á velli.