Valsstúlkur voru meira með boltann en þær náðu ekki að opna vörn FH nægilega vel til að skapa sér alvöru færi. Þær fengu líka þó nokkur föst leikatriði sem þær hefðu getað nýtt betur en allt kom fyrir ekki. Á meðan voru FH stelpur skipulagðar varnarlega og gáfu fá færi á sér. En það sem gerði útslagið var einbeitingarleysi leikmanna Vals varnarlega og ákveðni FH stúlkna til að nýta sér þau.

Atvikin eru tvö í þessum leik og það eru mörkin tvö. Sandra í marki Vals gerir sig seka um einstaklingsmistök í fyrra markinu og svo Málfríður í því seinna.

Valur á ekki lengur möguleika á að enda í 2. sæti deildarinnar. Það besta sem þær gera úr þessu er 3. sætið. Lið FH hefur tryggt sér 6. sæti deildarinnar og bætir enn stigametið sitt í efstu deild. Þær eru nú eina liðið sem getur komið í veg fyrir að Þór/KA verði Íslandsmeistarar.

Sandra í marki Vals gerði slæm mistök í fyrra marki FH þar sem hún virtist ekki vera undir mikilli pressu en tapar svo boltanum til sóknarmanns FH. Málfríður Erna gerir svo svipuð mistök í öðru marki FH þar sem sóknarmaður hirðir af henni boltann við vítateigslínuna. Þær taka þetta á sig í dag en allt lið Vals var samt illa einbeitt í dag. Sendingar þeirra voru ónákvæmar og þær virtust ekki alveg í takt. Sóknarlega virtust þær sakna Vesnu sem leikur líklegast ekki meira með liðinu á tímabilinu og þá gengur Thelma ekki heil til skógar og þurfti að fara af velli í kringum 60. mínútu.

Auðveldur leikur að dæma og engin vafaatriði. Ekki eitt einasta spjald fór á loft.