Í raun má segja að ástand vallarins á Akureyri hafi komið veg fyrir að úr yrði góður knattspyrnuleikur. Leikmenn áttu í mestu vandræðum með einfaldar sendingar og leikurinn komst aldrei á flug að sökum þess.

Cristian Martinez fékk bolta í höfuðið í upphitun og virtist vankast við höggið. Aron Elí kom inn í stað Martinez og lék sinn fyrsta leik í efstu deild. Stóð sig með prýði í frumraun sinni.

Úrslitin þýða það að KA er enn í 9. sæti með 5 stig eftir 5 umferðir. Túfa og hans menn hafa klárlega litið á þennan leik sem gott tækifæri til þess að komast almennilega af stað í sumar og jafntefli því svekkjandi úrslit fyrir KA. Keflvíkingar fara hins vegar suður yfir heiðar stiginu ríkari og Guðlaugur getur klárlega verið sáttur með framlag og hugarfar sinna manna í dag. Mæta ÍBV um næstu helgi í mikilvægum leik og stigið hér í dag er gott veganesti.

Akureyrarvöllur. Leikurinn í dag var ekki upp á marga fiska en það er lítið hægt að sakast við leikmenn liðanna í dag. Völlurinn er einfaldlega langt frá því að vera reiðubúinn og býður ekki upp á betri knattspyrnu en við sáum í dag.

Helgi stóð sig vel í dag. Það var nokkuð mikil harka til að byrja með í leiknum en hann missti ekki tökin og leyfði mönnum að takast á.