Einstaklingsmistök hjá Nile Walvyn í fyrri hálfleiknum sem hungraður Sólon Breki nýtti sér í tvígang til hins ýtrasta, þessi mistök voru dýrkeypt því jafnræði var með liðunum út á velli langtímunum saman.

Vítaspyrnudómurinn snemma í síðari hálfleik gróf gestunum dýpri holu en þeir gátu komið sér upp úr. Vítaspyrnudómurinn var vægast sagt umdeildur og var satt best að segja ekki í takt við flæði leiksins. En heimamenn geta ekki annað en verið sáttir við dóminn.

Úrslitin þýða að eyðimerkurgöngu Leiknisliðsins eftir stigi og sigri er lokið og gefur liðinu nauðsynlegan grunn til að byggja á nú þegar þjálfaramál félagsins eru óráðin.

Nile Walvyn gerði tvö dýrkeypt mistök í fyrri hálfleiknum sem bæði berskjölduðu gestina á örlagaríkan hátt og refsuðu heimamenn grimmilega í kjölfarið.

Verð að segja að þessi vítaspyrnudómur var rangur - það var snerting jú en við værum að horfa á flautukonserta í hverjum leik ef þetta er viðmiðið. Stórt atriði sem ÍR ingar gátu ekki unnið sig út úr.