Skyndisóknarhæfileikar Vals réðu úrslitum í dag. Þetta var daufur leikur en markið kom úr hraðri sókn sem kom í kjölfar á góðu færi heimamanna.

Segir sig sjálft en ég ætla að bæta við sigurmarki leiksins. Yvan var með skalla og geystust Valsmenn í sókn. Andri Adolphs sendi á Kristinn Frey sem tók frábærlega við boltanum áður en hann klobbaði Halldór Pál.

Valur verður á toppnum þegar Ísland mætir Argentínu og ÍBV er í fallbaráttu. Kristján Guðmunds talaði mikið um falldrauginn í fyrra og er spurning hvenær þeirra kynni verða endurvakin.

Rasmus Christiansen fótbrotnaði illa í þessum leik og fengu leikmenn liðana sjokk. Í spjalli eftir leik lýsti Haukur Páll fyrir mér hvernig hann sá fótinn og voru það ekki fallegar lýsingar. Fáir fóru heim af Hásteinsvelli í kvöld hugsandi um fótbolta.

Tilviljunarkennd dómgæsla. Auðvitað ætlaði Siggi Ben ekki að meiða Rasmus og var þetta algert óviljaverk en hann hefði átt að fá spjald. Var einfaldlega of seinn. Sömuleiðis átti Kristinn Freyr að fá spjald fyrir sóðalega tæklingu á Kaj Leo. Lengst um hafði dómaratríóið góð tök á leiknum en þetta var undarlegt án þess að fá falleinkunn.