Það verður forvitnilegt að sjá hvernig þetta verður. Bæði lið gætu verið þreytt, Víkingar eftir ferðalagið og KR-ingar eftir 120 mínútur gegn Cork. En það kemur í ljós hvernig þetta þróast.

Nú fer heldur betur að styttast í leik. Borgin með Hjálmum á fóninum eins og þegar Gunnar Nelson mætir til leiks! Óskum annars þeim meistara fyrir frábæran sigur í nótt.

Leikurinn er mikilvægur fyrir bæði lið af mismunandi ástæðum. KR-ingar þurfa sigur til að halda pressu á FH í toppbaráttunni, en FH-ingar mæta Fylki á sama tíma í kvöld. Þremur stigum munar á liðinu. Víkingar eru dottnir í bullandi botnbaráttu og þurfa helst að fara að vinna leiki til að rífa sig úr henni.

Það er heil eilífð síðan liðin spiluðu deildarleik, en þau hafa verið að dunda sér í bikarnum og Evrópu. KR er enn á fullri siglingu í bikarnum en Víkingur úr leik. KR er enn á fullri siglingu í Evrópu en Víkingur úr leik. Bæði lið fá samt að spila sína 22 leiki í deildinni, það verður ekki tekið af þeim.

Þorsteinn Már Ragnarsson gæti verið að spila sinn síðasta leik fyrir KR hér í kvöld! Hann er í byrjunarliðinu, spurning hvort það sé til að uppfylla klásúlu og koma í veg fyrir að hann megi fara eitthvað ódýrara? Nei ég veit ekki.. þetta er allt bara slúður sem er verið að búa til í hausnum á mér.

Stefán Logi Magnússon, aðalmarkvörður KR, meiddist undir lok leiks gegn Cork á dögunum og er ekki í hóp út af því. Hinn bráðefnilegi Hörður Fannar Björgvinsson er á bekknum hjá KR og Sindri Snær á milli stanganna. Svo er Óskar Örn Hauksson á bekknum líkt og Gonzalo Balbi og Gary Martin. Gary var frábær gegn Cork á dögunum er enn að spila sig í leikform eftir meiðsli. Balbi sat hjá gegn Cork vegna meiðsla.

Skoðum aðeins KR, þar er allt að frétta. Sindri Snær Jensson er kominn í markið hjá Vesturbæjarliðinu! Húrra fyrir því!

Markaskorarinn frá Koper, Arnþór Ingi Kristinsson sem gerði bæði mörkin í 2-2 jafntefli í Slóveníu, er verðlaunaður með byrjunarliðssæti. Það er svo fallegt þegar menn eru verðlaunaðir fyrir að leggja hart að sér, nánast bara eins og Verzló söngleikur!

Víkingur er án fyrirliðans og lykilmanns Igor Taskovic, en hann tekur út leikbann. Munar heldur betur um minna, Tasko á nánast undantekningalaust góða leiki. Þá er Rolf Toft kominn á bekkinn líkt og gegn Koper á dögunum.

Byrjunarliðin eru mætt og má sjá þau hér til hliðar. Bæði lið voru að spila Evrópuleiki í nýafstaðinni viku, Víkingur fór til Slóveníu og datt naumlega úr leik en KR fór áfram með sigri gegn Cork í framlengdum leik í Vesturbæ.

Góða kvöldið dömur og herrar. Velkomin í beina textalýsingu frá leik Víkings og KR. Hvað er betri leið til að loka þessari fallegu júlí-helgi heldur en eitt stykki hörku Reykjavíkurslagur í Pepsi-deildinni? Nákvæmlega ekki neitt!