Liðin ganga hér inn og verið er að kynna heimaliðið með dynjandi trumbuslætti undir. Fínasta stemning á pöllunum og vonandi mun það bara aukast. Þetta fer að bresta á, dómarinn er lítið að stressa sig á settum tíma!

Liðin gengin til búningsklefa. Aðeins fimm mínútur í að Pepsi veisla sumarsins hefjist!

Bæði lið eru loks komin út í upphitun. Heimakonur létu bíða aðeins lengur eftir sér. Dómaratríóið er einnig farið að hita. Sigurður Hjörtur Þrastarson er á flautunni og honum til aðstoðar eru Ásgeir Þór Ásgeirsson og Sveinn Þórður Þórðarson.

Byrjunarliðin eru komin inn, það styttist og styttist í þetta! Þau má sjá hér til hliðar.

Jóhann Kristinn Gunnarsson, fyrrum þjálfari Þór/KA, spáði í spilin fyrir 1.umferð Pepsi deildar kvenna hér á fotbolti.net. Að neðanverðu má sjá spá hans fyrir leikinn!

Þór/KA 2 - 2 Valur (17:45 í dag)
Það verður rafmagnað andrúmsloftið í Boganum í fyrsta leik tímabilsins í Pepsi kvenna. Valur nýbúnar að slá ÞórKA út í undanúrslitum Lengjubikarsins og liðin skiptust á að rassskella hvort annað í fyrra. Yfirleitt engin lognmolla í leikjum þessara tveggja frábæru liða svo ég spái mörkum, baráttu og hasar. Það er teiknað í skýin að Arna Sif jafnar leikinn í blálokin eftir að Anna Rakel og Stephany koma heimastúlkum tvisvar yfir.

Liðin mættust í riðlakeppni Lengjubikarsins í febrúar þar sem Valur vann 3-0 sigur. Þau mættust svo aftur í undanúrslitum þar sem Valur hafði aftur betur, 2-1, í þó jafnari leik. Valskonur fóru svo alla leið og urðu Lengjubikarsmeistarar árið 2017.

Töluvert hafa liðin misst í lengri meiðsli í vetur. Fjórir leikmenn þessara liða hafa slitið krossbönd undanfarið, fjórir!

Mist Edvardsdóttir, Dóra María Lárusdóttir og Elísa Viðarsdóttir hjá Val hafa allar orðið fyrir því óhappi að slíta krossband í vetur. Mist sleit fremra krossband á æfingu í janúar en Dóra María og Elísa slitu fremra krossband í síðustu tveimur landsliðsverkefnum. Að öllum líkindum verður engin þeirra neitt með í sumar.

Sandra María Jessen hjá Þór/KA sleit einnig krossbönd á Algarve mótinu með landsliðinu en ljósið í hennar myrkri er þó að þar var um aftari krossbönd að ræða. Hún er nú í endurhæfingu og ætti að geta spilað með liðinu seinni hluta sumars ef allt gengur að óskum.

Meira er um breytingar hjá Valsliðinu. Þær hafa fengið til sín ungar og spennandi stelpur í vetur eins og Stefaníu Ragnarsdóttur frá Þrótti og Hrafnhildi Hauksdóttur frá Selfossi. Stefanía er bráðefnileg, fædd árið 2000, en hefur fengið tækifæri í vetur og skoraði m.a. í úrslitaleik Lengjubikarsins. Hrafnhildur er einungis 21 árs en á að baki 68 leiki fyrir Selfoss og 4 A-landsleiki.

Auk þeirra gengu tvær mexíkóskar landsliðskonur til liðs við Val, þær Ariana Calderon og Anisa Guajardo. Ariana spilaði síðast í Noregi en Anisa í Ástralíu. Stærsti biti vetrarins á Hlíðarenda er þó Málfríður Erna Sigurðardóttir sem kom til baka til liðsins frá Breiðablik. Hún var hreint út sagt frábær í Kópavoginum í fyrra og færir Valsliðinu mikla reynslu og gæði.

Ekki fóru margar úr Valsliðinu annað en Lilja Dögg Valþórsdóttir, Rúna Sif Stefánsdóttir og Rebekka Sverrisdóttir hættu knattspyrnuiðkun.

Ekki er mikið um breytingar á leikmannahópi Þór/KA milli ára þó alltaf sé eitthvað. Heiða Ragney Viðarsdóttir hafði félagsskipti til Bandaríkjanna. Írunn Þorbjörg Aradóttir yfirgaf félagið ásamt mexíkóska markverðinum Ceciliu Santiagos auk þess sem fyrirliðinn Karen Nóadóttir þurfti að hætta knattspyrnuiðkun sökum meiðsla.

Markvörðurinn Bryndís Lára Hrafnkelsdóttir, 26 ára, gekk til liðs við norðankonur í vetur frá ÍBV þar sem hún hafði spilað síðastliðin ár. Hún á að baki 96 úrvalsdeildarleiki og þekkir því Pepsi deildina út og inn.

Einnig fengu Þór/KA til sín Biöncu Elissu Sierra, 25 ára mexíkóska landsliðskonu, sem bæði getur spilað sem miðvörður og á miðjunni.

Bæði lið fengu nýja þjálfara í vetur.

Halldór Jón Sigurðsson, sem áður stýrði karlaliði Þórs, tók við liði Þór/KA af Jóhanni Kristni Gunnarssyni sem tók við karlaliði Völsungs. Halldór, eða Donni eins og hann er ævinlega kallaður, fékk Andra Hjörvar Albertsson sér til aðstoðar. Jóhann Kristinn hafði stýrt Þór/KA í fimm ár og gert liðið einu sinni að Íslandsmeisturum, árið 2012.

Úlfur Blandon hætti með karlalið Gróttu og tók við kvennaliði Vals í vetur af Ólafi Brynjólfssyni sem gerðist aðstoðarþjálfari karlaliðs Fram í kjölfarið. Ólafur hafði stýrt Valsliðinu í eitt ár. Úlfur fékk Kristínu Ýr Bjarnadóttur sér til aðstoðar en þessi fyrrum markaskorari Vals lagði skónna á hilluna síðasta haust.

Leikir þessara liða á síðustu leiktíð buðu upp á mikið af mörkum og töluverðar sviptingar. Fyrri leikinn, á sínum heimavelli, unnu Valsarar 6-1 en Þór/KA náði fram hefndum í seinni umferðinni er þær unnu 4-0 sigur á Akureyri.

Báðum liðum er spáð í toppbaráttu Pepsi deildarinnar hér á fotbolti.net. Heimakonum í Þór/KA er spáð 4.sæti á meðan Valskonum er spáð 2.sæti.

Á síðasta tímabili endaði Valur í 3.sæti, 5 stigum frá Íslandsmeisturum Stjörnunnar, á meðan Þór/KA endaði í 4.sæti.

Góðan daginn!
Hér munum við fylgjast með leik Þór/KA og Valskvenna í 1.umferð Pepsi deildar kvenna 2017.