Liðin eru mætt út á völl. Fyrir leik fær Blikinn Ásta Eir Árnadóttir viðurkenningu en hún hefur náð þeim áfanga að spila 100 leiki fyrir meistaraflokk Breiðabliks.

Það styttist í "kick off" og byrjunarliðin eru klár.

Þorsteinn Halldórsson gerir tvær breytingar á liði Breiðabliks frá 2-0 tapinu gegn ÍBV í síðasta deildarleik. Þær Samantha Jane lofton og Selma Sól Magnúsdóttir koma inn fyrir Guðrúnu Arnardóttur og Hildi Antonsdóttur sem fara á bekkinn.

Donni heldur áfram að spila á sömu leikmönnum Þórs/KA og gerir engar breytingar frá síðasta leik.

Það er toppmaðurinn Gunnar Jarl Jónsson sem flautar leikinn hér á eftir en honum til aðstoðar verða þeir Ottó Sverrisson og Sigursteinn Árni Brynjólfsson.

Það sást til Gunnars í lazertagi í gær þar sem hann átti erfitt uppdráttar gegn sprækum nemendum og samstarfsfólki sínu í Langholtsskóla en hann mætir klár til leiks á eftir. Töluvert betri á flautunni en geislabyssunni.

Breiðablik hefur orðið bikarmeistari 13 sinnum en gestirnir í Þór/KA aldrei.

Besti árangur þeirra var annað sætið árið 2013 en þá mætti liðið einmitt Breiðablik í úrslitaleik sem fór 2-1 fyrir Blikum. Guðrún Arnardóttir og Rakel Hönnudóttir skoruðu mörk Breiðabliks í þeim leik en þær leika auðvitað ennþá með liðinu. Það var hinsvegar Katrín Ásbjörns sem skoraði mark Þórs/KA.

Í liði Breiðabliks í dag eru sex leikmenn sem spiluðu þann leik en öllu meiri breytingar hafa orðið á leikmannahópi Þórs/KA á þessum fjórum árum og aðeins þrír leikmenn enn í liðinu sem tóku þátt í úrslitaleiknum 2013.

Fróðlegt verður að sjá hvernig liðin nálgast leikinn í dag en bæði hafa þau á markmiðaskránni að vinna Borgunarbikarinn og hafa alla burði til.

Breiðablik er ríkjandi bikarmeistari en liðið vann ÍBV 3-1 í úrslitaleik þann 12. ágúst síðastliðinn.

Þór/KA datt hinsvegar úr leik í undanúrslitum í fyrra þegar liðið tapaði fyrir ÍBV með einu marki.

Þór/KA hefur farið á kostum í Pepsi-deildinni í sumar og unnið alla leiki sína.

Breiðablik hefur hinsvegar hikstað og tapað tveimur leikjum, þar á meðal útileik gegn Þór/KA fyrir norðan í annarri umferð.

Þá vann Þór/KA 1-0 sigur en það var líklega naumasti sigur liðsins á tímabilinu þar sem að Breiðablik átti fín tækifæri til að setja mörk og fá eitthvað út úr leiknum.

Það er engin ástæða til að búast við öðru en hörkuspennandi og skemmtilegum leik. Síðustu 5 viðureignir liðanna hafa verið æsispennandi. Þór/KA hefur unnið einn leik, Breiðablik tvo og tvisvar hafa liðin skilið jöfn.

Góðan dag kæru lesendur Fótbolta.net og verið velkomin í beina textalýsingu frá riiiisa bikarslag Breiðabliks og Þórs/KA!

Um er að ræða lokaleik í 16-liða úrslitum Borgunarbikarsins. Aðrir leikir í 16-liða úrslitum voru spilaðir í gær og úrslitin eftirfarandi:

Þróttur R. 0-3 Haukar
Sindri 2-5 Grindavík
Selfoss 0-1 ÍBV
KR 1-5 Stjarnan
FH 0-4 Valur
HK/Víkingur 2-1 Fjölnir
Tindastóll 2-1 Fylkir