Sæmileg mæting á völlinn í dag, þokkalega þétt setið heima megin en langt frá því full stúka. Eins og það er flott veður.. En allavega, örfáar mínútur í leik!

Nú styttist heldur betur í leik, ekki nema um tíu mínútur. Menn virðast vera vel upphitaðir og vel gíraðir.

Þvílíkt blíðskaparveður í Vesturbænum. Leikmenn eru ekkert að drífa sig að hita upp, en ég bara get ekki ímyndað mér betra veður fyrir fótbolta, þó það sé reyndar smá gola.

Grindavík gerir eina breytingu á sínu liði frá því í 1-0 sigrinum gegn Val í síðustu umferð. Alexander Veigar Þórarinsson er ekki í hóp og Brynjar Ásgeir Guðmundsson kemur inn í byrjunarliðið í hans stað. Andri Rúnar Bjarnason var ekki með í síðasta leik, bikarleik gegn Leikni, en er kominn aftur í liðið.

KR gerir tvær breytingar á liði sínu frá því í 2-2 jafnteflinu gegn FH í síðustu umferð. Markvörðurinn Beitir kemur inn í byrjunarliðið, ekkert óvænt við það. Þá fer Gunnar Þór Gunnarsson einnig í byrjunarliðið fyrir Robert Johan Sandnes.

Byrjunarliðin eru nú að detta í hús.

Grindavík hefur unnið tvo síðustu deildarleiki sína eftir að hafa tapað gegn Víkingi Ólafsvík þar á undan. Nú síðast vann Grindavík frábæran 1-0 sigur gegn Val, sem hafði byrjað mótið glæsilega. KR gerði 2-2 jafntefli gegn FH í síðasta deildarleik og tapaði 2-1 gegn Val þar á undan.

Talandi um markmann, þá hefur KR verið í smá markmannabasli og á dögunum fékk liðið Beiti Ólafsson í sínar raðir á undanþágu. Enda eru Stefán Logi Magnússon og Sindri Snær Jensson báðir meiddir og KR þurfti því að leita í 2. flokkinn í síðasta leik gegn ÍR eftir að Sindri Snær fór meiddur af velli. Það verður forvitnilegt að sjá hvort Beitir byrjar í dag, það verður að teljast nokkuð líklegt.

Beitir, sem er þrítugur, er uppalinn hjá HK en spilaði síðast með Keflavík í Inkasso-deildinni á síðustu leiktíð. Hann lék 21 leik í deildinni. Hann hætti hjá Keflavík eftir síðasta tímabil og hefur ekki spilað fótbolta síðan þá.

Á ferli sínum hefur Beitir leikið yfir 150 leiki í 1, 2 og 3. deild en hann gæti nú fengið sitt fyrsta tækifæri í Pepsi-deildinni.

Bæði lið koma inn í þennan leik eftir að hafa farið alla leið í vítaspyrnukeppni í Borgunarbikarnum í síðasta leik. KR vann dramatískan sigur á ÍR þar sem hinn ungi markvörður Jakob Eggertsson var hetjan. Grindavík tapaði hins vegar í vítaspyrnukeppni gegn hinu Breiðholtsliðinu, Leikni.

Sumarið hefur heldur betur farið vel af stað, skemmtileg og spennandi deild framundan. Þessi leikur er í 6. umferðinni og staðan er þannig að Grindavík er í 3. sætinu með 10 stig og KR er í 6. sætinu með 7 stig. Ég efast um að margir hefðu trúað því fyrir mót að eftir fimm umferðir yrði Grindavík þremur stigum á undan KR. En lærisveinar Óla Stefáns Flóventssonar hafa verið virkilega flottir það sem af er tímabils.

Komið þið hjartanlega sæl og blessuð og verið velkomin í beina textalýsingu Fótbolta.net frá leik KR og Grindavíkur í Pepsi-deildinni á þessum fallega degi. Alexander Freyr Einarsson heiti ég og mun lýsa leiknum fyrir ykkur í kvöld. Leikurinn hefst á slaginu 19:45 í Frostaskjólinu.