Gæsahúð - tékk!! Þvílík stemning í þjóðsöngnum og nú styttist í að Alberto Undiano Mallenco flauti leikinn á!

Þá er komið að þjóðsöngvunum. Aldrei þessu vant er stúkan nærri því full á þessum tímapunkti, greinilegt að fyrirmæli lögreglu og KSÍ um að mæta snemma skiluðu sér, allavega að mestu leyti. Kannski hjálpaði FanZone-ið. Allavega, bravó!

Þá koma leikmennirnir inn á völlinn við dynjandi lófatak!

Þess má geta að Úkraína vann 2-1 sigur gegn Finnlandi á útivelli fyrir skömmu. Þannig Úkraínumenn fara upp í 2. sætið. Finnar hefðu nú mátt gera okkur smá greiða í dag.

Þá er "Ég er kominn heim" komið á fóninn og allir í góðum gír.

Friðrik Dór er vallarþulur í dag. Páll Sævar Guðjónsson, Röddin, er fjarri góðu gamni.

Gaman að segja frá því að maðurinn sem skoraði bæði mörkin í 2-0 sigri Króatíu í Zagreb í síðasta leik er kominn á bekkinn, hann Marcelo Brozovic. Við grátum það bara alls ekki.

Hér til hliðar má nú sjá byrjunarliðin. Líklega það óvæntasta að Emil komi inn á miðjuna og að Gylfi fari fram, sem og að Hörður Björgvin byrji í vinstri bakverðinum fram yfir Ara Frey Skúlason.

Byrjunarlið Króata er einnig komið. Líkt og menn héldu kemur Mateo Kovacic inn fyrir Ivan Rakitic.

Byrjunarlið Íslands er komið í hús. Hörður Björgvin Magnússon byrjar í vinstri bakverði á kostnað Ara Freys Skúlasonar. Emil Hallfreðsson kemur inn á miðjuna og Gylfi Þór Sigurðsson spilar frammi ásamt Alfreð Finnbogasyni.

Króatískir stuðningsmenn halda áfram að tínast inn í sitt afgirta hólf. Ég rakst á nokkra í miðbænum í dag og þeir virtust bara vera hressir og í góðu skapi. Eins og einhverjir vita þurftu Ísland og Króatía að mætast fyrir luktum dyrum í Zagreb í síðasta leik vegna óláta stuðningsmannanna. Við vonum að þeir verði bara prúðir og góðir í dag.

Fólk streymir inn á FanZone og þá styttist í að Tólfan komi í skrúðgöngu á völlinn, en hún ætlar að vera mætt klukkutíma fyrir leik og keyra upp stemninguna. Þvílík veisla.

Það er kominn tími á að við vinnum Króatana. Hver man ekki eftir því þegar þeir mölbrutu hjörtu okkar Íslendinga með því að slá okkur úr leik í umspili um sæti á HM 2014 í Brasilíu? Þá unnu þeir okkur 2-0 í Zagreb, manni færri eftir að Mario Mandzukic hafði verið rekinn út af. Þeir unnu okkur svo aftur 2-0 í Zagreb fyrr í þessari keppni.

Síðast þegar liðin mættust á Laugardalsvelli urðu lokatölur 0-0, sem var fín niðurstaða. Sérstaklega miðað við að Ólafur Ingi Skúlason fékk að líta rauða spjaldið í þeim leik.

Nú fer vonandi að styttast í byrjunarliðin. Einn og hálfur tími í að veislan hefjist í Laugardalnum.

Þvílík og önnur eins veðurblíða hefur varla sést á landsleik. Hversu geðveikt veður fyrir svona frábæran leik milli frábærra liða. Samkvæmt mínum heimildum eru menn í virkilega góðu yfirlæti í sólinni fyrir utan Ölver og þá er stemning að myndast á FanZone-inu fyrir utan Laugardalsvöll.

Annars hvet ég þig eindregið, ef þú vilt koma þér almennilega í gírinn, að tékka á þeim aragrúa af upphitunarefni sem má finna á vefnum. Ef þú ferð í "Flokkar" fyrir ofan efstu fréttir á forsíðu (appelsínugulur flipi) og velur þar "Íslenska landsliðið", þá sérðu bara landsliðsfréttir og getur farið í gegnum þetta frábæra efni.

Björn Bergmann Sigurðarson er vel stemmdur fyrir leiknum gegn Króötum og er ánægður með að vera byrjaður að spila með landsliðinu á ný.

,,Það var algjörlega kominn tími á það (að byrja aftur) og svo sér maður hvað þetta er frábært, ég get ekki sagt það að ég sjái eftir því að hafa ekki verið með, en það er bara rosalega gaman að vera hérna," sagði Björn hress.

Menn virðast almennt vera búnir að fyrirgefa honum eftir að hann tók sér frí frá landsliðinu í þjálfaratíð Lars Lagerback. Að minnsta kosti Einar Örn og Bjössi Hreiðars.

Ragnar Sigurðsson, varnarmaður Íslands hefur litlar áhyggjur af stórstjörnunum Luka Modric og Mario Mandzukic í leiknum, en þeir spiluðu báðir í úrslitaleik Meistaradeildarinnar á dögunum.

,,Það var allt annar leikur, þeir eiga eftir að koma hingað og eiga varla eftir að nenna þessu, þannig að ég er ekkert að spá í því."

,,Eins og við tölum af virðingu um Modric þá er ég viss um að þeir tali um Gylfa á sama hátt,"segir Ríkharður Daðason, fyrrum landsliðsmaður, um skærustu stjörnu íslenska landsliðsins í dag. Króatar þurfa heldur betur að vara sig á Gylfa, sem var sjóðheitur með Swansea á nýafstöðnu tímabili og átti mjög stóran þátt í því að liðið bjargaði sér frá falli. Okkar menn þurfa sömuleiðis að passa sig á Modric.

Helgi Kolviðsson vonast til að fólk mæti snemma á völlinn, en KSÍ býður upp á Fanzone fyrir utan Laugardalsvöll fyrir leikinn og vonandi myndast góð stemning þar!

Emil Hallfreðsson í viðtali fyrir leik:
,,Ég missi ekki svefn yfir því hvort ég sé í liðinu eða ekki. Það sem skiptir máli er að liðið nái stigum og árangri, þá er maður sáttur að vera partur af þessu."

Heimir segir að allir séu klárir, glaðir og tilbúnir í leikinn gegn Króötum. Vissulega er áhyggjuefni að þeir Birkir Bjarnason og Ragnar Sigurðsson hafa ekkert spilað undanfarið vegna meiðsla, en Heimir metur þá tilbúna í slaginn.

Talandi um Heimi Hallgrímsson, þá átti hann stórafmæli í gær, er hann varð fimmtugur. Ég hefði giskað á fertugur, maðurinn eldist greinilega betur en Andrea Pirlo!

Heimir Hallgrímsson heldur að sjálfsögðu í hefðina og heimsækir stuðningsmenn Íslands á Ölver fyrir leik. Frábær hefð sem erlendir fjölmiðlar botna ekkert í, en er svo einstaklega sjarmerandi!

Líklegt byrjunarlið Íslands að mati Tryggva Guðmundssonar má sjá með því að smella hér. Tryggvi spáir því að við stillum upp gamla góða EM-liðinu sem reyndist okkur svo vel í Frakklandi, nema að Alfreð Finnbogason komi inn fyrir Kolbein Sigþórsson sem hefur verið meiddur alla undankeppnina.

Þú getur smellt hér til að sjá líklegt byrjunarlið Króatíu. Við spáum því að hinn ágæti Mateo Kovacic komi inn fyrir Rakitic. Annar möguleiki í stöðunni er að Marcelo Brozovic fari af kantinum inn á miðjuna og Mario Mandzukic fari þá úr fremstu víglínu á kantinn. Nikola Kalinic myndi þá byrja frammi. Við teljum fyrri möguleikann líklegri.

Króatía hefur unnið fjóra síðustu leiki sína eftir að hafa byrjað keppnina með jafntefli gegn Tyrklandi.

Ísland er með 10 stig eftir fyrstu fimm leiki sína. Liðið byrjaði á hálf svekkjandi jafntefli á útivelli gegn Úkraínu og fylgdi því eftir með ótrúlegum 3-2 sigri heima gegn Finnlandi. Því næst kom stórgóður 2-0 sigur gegn Tyrkjum áður en strákarnir okkar töpuðu 2-0 í Zagreb. Í síðasta leik vannst svo sigur gegn Kósóvó í Albaníu, en sá leikur var tæpari en menn hefðu viljað.

Það verða að teljast ágætis fréttir fyrir okkur Íslendinga að tveir lykilmenn Króatíu eru fjarri góðu gamni. Um er að ræða Ivan Rakitic, miðjumann Barcelona, og Danijel Subasic, markvörð Mónakó. Króatar eiga þrátt fyrir það nóg af góðum leikmönnum, t.d. Spánar- og Evrópumeistarann Luka Modric. Hann á eftir að reynast erfiður.

Þessa stundina berjast Ísland og Króatía um toppsæti riðilsins. Króatía vann fyrri leik liðanna í Zagreb 2-0 og Ísland getur nánast gleymt toppsætinu ef Króatar hafa betur í kvöld. Ef Ísland vinnur eru hins vegar bæði lið jöfn að stigum, með 13 stig hvort, og þá getur allt í ósköpunum gerst!

Komið þið sælir kæru lesendur og verið velkomnir í beina textalýsingu frá leik Íslands og Króatíu í undankeppni HM 2018. Leikurinn fer fram á Laugardalsvelli klukkan 18:45, en hans hefur verið beðið með mikilli eftirvæntingu.