Anna Bára liggur meidd á vellinum en Keflvíkingar vilja eðlilega halda áfram og leita að sigurmarki. Boltinn berst loks aftur á Auði markvörð sem getur sett boltann útaf svo hægt sé að gera skiptingu.

Ljótt brot hjá Klöru. Hendir sér í bakið á Sophie úti á miðjum velli. Algjör óþarfi.

Þóra Kristín setur boltann fram úr aukaspuyrnunni en ÍR vinnur boltann.

Sveindís nær að snúa með boltann rétt utan teigs og reynir skot sem fer rétt yfir.

Fáum við fjórða markið í leikinn?

ÍR fær aukaspyrnu vinstra megin á miðjum vallarhelmingi Keflavíkur. Andrea Magg reynir skot að marki en boltinn endar í höndunum á Lauren.

Það er harka í þessu og Keflavík fær aukaspyrnu hægra megin á miðjum vallarhelmingi ÍR. Anita Lind kemur boltanum fyrir en ÍR-ingar hreinsa. Í kjölfarið munar litlu að Sveindís sleppi í gegn en Auður Sólrún er vel vakandi og nær til boltans.

Þung sókn heimakvenna!

Einnar snertingar bolti í teignum en Arsenal keimur af þessu og ÍR-ingar finna ekki skotið eftir þennan flotta samleik.

Þær halda í vonina um að fá eitthvað út úr leiknum.

Keflavík fær aukaspyrnu vinstra megin á miðjum velli. Þóra Kristín setur boltann inn á teig og ÍR-ingar hreinsa boltann fyrir fæturnar á Írisi Unu sem reynir skot utan teigs. Fín tilraun en boltinn beint á Auði Sólrúnu.

Hér er einn hress í stúkunni sem er mjög duglegur að segja Bríeti dómara fyrir verkum. Með allt á hreinu frá fyrstu mínútu. Spurning um að treysta einum af okkar bestu dómurum bara fyrir verkefninu? Allavegana eflaust stór áhrifavaldur í því af hverju við eigum ekki fleiri dómara. Ekki myndi ég nenna að hlusta á þetta í 90 mínútur.

Ástrós straujar Sophie utan teigs hægra megin og Keflavík fær aukaspyrnu.

Anita Lind sendir boltann fyrir en hann fer aftur fyrir.

Aftur eru löngu innköstin hennar Sveindísar að skapa usla. Keflavík vinnur hornspyrnu í kjölfarið á einu slíku en ÍR-ingar hreinsa.

Eiga Breiðhyltingar einhver tromp uppi í erminni til að snúa leiknum sér í hag?

Bæði lið búin að eiga ágætar langskotstilraunir síðustu mínútur og Bríet hefur þurft að flauta á nokkur brot úti á velli.

ÍR svarar með góðri sókn!

Boltinn dettur fyrir Söndru Dögg sem er komin ein gegn Lauren en hún skýtur beint á hana!

Keflavík á fyrsta sénsinn í seinni. Sveindís nálægt því að finna skotið í vítateig ÍR.

Birgitta er búin að fá nokkra fína skotsénsa í dag en þarf eitthvað að stilla miðið. Nú var hún að setja boltann laflaust framhjá úr ágætis séns rétt utan teigs.

Það er aldeilis fjör í þessu!

Sophie Groff var að reyna hörkuskot utan af velli sem Auður Sólrún varði vel í horn.

ÍR björguðu hornspyrnunni aftur fyrir og tókst svo að koma boltanum frá í þeirri síðari.

Aukaspyrna dæmd við hægra vítateigshornið hjá Keflavík eftir að Íris Una vinstri bakvörður setti fótinn í hausinn á Andreu Magg. Andrea tók spyrnuna sjálf og fann Lilju Gunnars sem átti hörkuskalla í stöngina!

FÆRI!

Klara fær boltann inn á teig og nær máttlausu skoti sem er á leiðinni vel framhjá en fer af Kristrúnu og næstum því í eigið mark. Þarna munaði litlu.

ÍR fær aftur horn og í þetta skiptið setur Mónika boltann beint fyrir en Keflvíkingar hreinsa.

Fyrsta hornið hjá ÍR. Mónika setur tvær hendur upp í loft og Sandra Dögg hleypur til hennar og fær boltann stutt. Hún er alein en ákveður samt að senda slakan bolta til baka á Móniku og varnarmenn Keflavíkur ná að trufla. Illa farið með fínan séns.

Annað horn hjá gestunum. Aftur fara þær Birgitta og Anita Lind saman út og aftur setur Birgitta boltann fyrir. ÍR-ingar hreinsa í horn.

Keflvíkingar halda sig við sama plan í næstu hornspyrnu en hún er ekki hættuleg og boltinn endar hjá Auði Sólrúnu.

Þarna missti ég af einhverju fjöri. Anita Lind fær tiltal hjá Bríeti og stúkan öskrar á spjald. Ég sá ekkert hvað gerðist og kenni auðvitað gluggunum á blaðamannaskúrnum um frekar en að taka þetta á mig.

Áfram skiptast liðin á að sækja. Ég sá nú ekki aðdragandann að þessu nógu vel en sýndist það vera Andrea sem var sterkust í teignum og náði ágætu skoti sem rúllaði rétt framhjá fjærstönginni á Keflavíkurmarkinu.

Galopinn leikur þó gestirnir séu meira með boltann.

Flott sókn hjá Keflavík!

Sveindís spólar sig framhjá tveimur varnarmönnum og sendir boltann svo til hliðar á Sophie sem kemur á ferðinni. Sophie platar alla upp úr skónum og lætur boltann fara svo hann endar hjá Birgittu sem er ein hægra megin við Sophie. Birgitta hittir boltann hinsvegar ekki nógu vel og skýtur beint á Auði.

Fín tilþrif.

Dagmar!

Dagmar Mýrdal rekur endahnútinn á ágætis sókn ÍR en hún skallar boltann rétt yfir.

Sofandaháttur í varnarlínu gestanna þarna.

Sveindís reynir skot utan af velli en boltinn vel framhjá.

Keflavík fær fyrstu hornspyrnu leiksins og það er Birgitta sem tekur hana. Ágætur bolti inn á teig sem hrekkur út á Írisi Unu sem reynir skot í tvígang. Fyrst skýtur hún í varnarmann og svo þrumar hún hátt yfir.

Færi hjá ÍR!

Dagmar á misheppnað skot sem dettur fyrir Móniku sem reynir viðstöðulaust skot af teignum. Hún hittir boltann illa og hann fer hátt yfir.

Lið Keflavíkur lítur svona út:

Lauren
Arndís - Kristrún Ýr - Þóra Kristín - Íris Una
Brynja - Katla María
Birgitta - Sophie - Aníta Lind
Sveindís

Fínn séns hjá gestunum. Birgitta fær góðan bolta í gegn hægra megin en Auður kemur vel út á móti og Birgitta nær ekki nógu góðu skoti.

Saga sumarsins hjá Sveindísi. Það á aldeilis að taka hart á henni. Nú var Mykaylin að keyra inn í hana svo Sveindís fékk högg á hnakkann. Gunnar Magnús þjálfari eðlilega ekki sáttur og lætur heyra vel í sér.

Vel gert hjá Lauren markverði. Andrea Magg var við það að komast í skotfæri í vítateig Keflavíkur eftir háa sendingu en Lauren kom út á hárréttum tíma og handsamaði boltann.

Keflavík byrjar þetta miklu betur og þær vilja vítaspyrnu!

Þóra Kristín á hættulegan bolta inn á teig úr aukaspyrnu utan af velli. Boltinn dettur í áttina að Sveindísi sem er ekki komin með vald á honum en er augljóslega spörkuð niður.

ÍR-ingar stálheppnar að sleppa með skrekkinn þarna. Sveindís þarf í kjölfarið að fá aðhlynningu utan vallar. Þetta var ekki þægilegt. Það er á hreinu.

ÍR stillir svona upp:

Auður
Anna Bára - Mykaylin - Lilja - Bryndís María
Klara - Sonja Björk
Sandra Dögg - Andrea - Mónika
Dagmar

Hætta við mark ÍR!

Sveindís Jane tekur langt innkast inn á teig þar sem hún finnur Kötlu Maríu. Katla María reynir skalla en nær ekki að stýra honum nógu vel og setur boltann upp í hendurnar á Auði markverði.

Keflavík fær aukaspyrnu aftarlega á vallarhelmingi ÍR. Þóra Kristín flengir háum bolta inn á teig en hann svífur yfir allan pakkann og aftur fyrir.