Fjölnir unnu hlutkestið og byrja á að sækja í átt að Flataskóla undan golunni að hluta allavega.

Stjarnan byrjar.

Allt að verða klárt í Garðabænum, þessi verður alvöru.

Íðilhljómfögur rödd vallarþuls þeirra Garðbæinga hefur lokið því að lesa upp liðsskipanina.

Eins og yfirleitt þegar Ólafur Karl spilar var mest klappað fyrir hans nafni við þann upplestur.

Heimir Hallgríms og Helgi Kolviðs eru mætti að horfa á leikinn, væri nú bara helvíti flott ef fleiri myndu mæta með þeim á völlinn!

Alex Þór Hauksson og Hólmbert Aron Friðjónsson taka út leikbann í liði Stjörnunnar. Eyjólfur Héðinsson kemur aftur inn á miðjuna og Ólafur Karl Finsen byrjar sinn fyrsta leik síðan í júní.

Ingimundur Níels Óskarsson er í banni hjá Fjölni og Igor Jugovic kemur inn í liðið fyrir hann síðan í leiknum gegn KA á dögunum.

Þá er tilvalið að minnast á það líka að þeir sem eru á twitter eiga endilega að skella myllumerkinu #fotboltinet inn í sín tíst ef þeir hafa hug á því að leyfa þeim að fljóta með í umræðunni okkar um þennan leik...

Fljótt á litið eru engir leikmenn í hópnum sem að hafa spilað leiki fyrir mótherjann.

Ef einhver vill leiðrétta þær upplýsingar þá þigg ég það með þökkum...t.d. með því að benda mér á það á twitter.

Fyrri leik þessara liða lauk með 3-1 sigri Stjörnumanna í Grafarvoginum.

Fyrrnefndur Hólmbert Aron setti tvö mörk fyrir gestina í þeim leik og Guðjón Baldvinsson skoraði það þriðja. Fyrir Fjölnismenn skoraði Marcus Solberg, minnkaði muninn í 1-3 þegar um kortér lifði leiks.

Dómarateymi dagsins er skipað eftirfarandi mönnum:

Þorvaldur Árnason er á flautunni, honum til aðstoðar með flöggin eru þeir Bryngeir Valdimarsson (AD1) og Jóhann Gunnar Guðmundsson (AD2). Varadómari er Sigurður Óli Þórleifsson og eftirlitinu í kvöld sinnir Björn Guðbjörnsson.

Stjörnumenn búa við það að hafa 2 leikmenn í leikbanni í þessum leik, Hólmbert Aron Friðjónsson fékk rauða spjaldið í leik liðsins við KA og Alex Þór Hauksson er í leikbanni vegna uppsafnaðra fjögurra gulra spjalda í sumar.

Það sama á við Ingimund Níels Óskarsson hjá Fjölni, hann situr leikinn af sér í banni vegna uppsafnaðra spjalda.

Það er auðvitað að heilmiklu að keppa fyrir bæði lið.

Stjarnan gæti minnkað muninn á Valsmenn niður í tvö stig á toppnum ef úrslit kvöldsins verða þeim hagstæð svo að þar er draumur um toppslag í algleymi.

Fjölnismenn eru hins vegar á kafi í fallbaráttunni, eftir sigur ÍBV eru Grafarvogspiltar nú jafnfætis Eyjapeyjum í stigagjöfinni í fallbaráttunni með 16 stig og einungis betri markatala þeirra heldur þeim frá fallsæti.

Leikurinn er liður í 16.umferð Pepsideildar en að honum loknum verða Fjölnismenn þó bara búnir að leika 15 leiki í deildinni þar sem þeir eiga inni leik við FH frá í síðustu umferð.

Góða kvöldið og verið hjartanlega velkomin í beina textalýsingu frá Stjörnuvellinum þar sem heimamenn fá Grafarvogspiltana úr Fjölni í heimsókn.