Þá ganga liðin inn á völlinn! Grindvíkingar í sínum hefðbundnu gulu búningum, á meðan KR leika í sínum hefðbundnu svarthvítu búningum. Það er ekkert verið að flækja einhver búningamál hér.

Hinn eldhressi Dagbjartur Einarsson er mættur á völlinn. Alltaf gaman að sjá hann á vellinum hérna en hann er einhver helsti stuðningsmaður grindvískrar knattspyrnu.

Ég væri að ljúga af ykkur ef ég segði að það væri fjölmennt í stúkunni. Þessi mæting er arfaslök. Það nær ekki í þriggja stafa tölu og rúmar fimm mínútur í leik. En það er verið að spila Grindavíkurlagið og það dregur kannski einhverja áhorfendur hingað, enda frábært lag

Helmingur leikmanna Grindavíkur í dag koma erlendis frá. Tveir frá Bosníu, þrír frá Spáni, einn Dani, einn Færeyingur, einn Bandaríkjamaður og einn Pólverji. Það er allt svo alþjóðlegt og skemmtilegt hérna í Grindavík

Líkt og áður hefur komið fram er mikil Pepsi veisla framundan í dag. Einn leikur búinn og leikurinn hér í Grindavík er annar leikurinn í dag. Veislan lýkur svo með stórleik Stjörnunnar og FH. Fótbolti.net verður að sjálfsögðu með puttann á púlsinum á öllum stöðum í dag.

Það er ágætis veður hérna í Grindavík. Lognið fer hægt yfir og þá er einnig þurrt. Beggi vallarstjóri er mættur út á völl, þannig það er allt eins og það á að vera hérna í Grindavík

Byrjunarliðin eru komin! Engar breytingar eru á liði KR frá því í síðasta leik en Grindvíkingar gera þrjár breytingar á sínu liði. Alexander Veigar sest á bekkinn og Brynjar Ásgeir er ekki í leikmannahópnum í kvöld. Þá er Sam Hewson í leikbanni. Inní liðið koma William Daniels og Edu Cruz, sem og, í sínum fyrsta leik í Pepsi-deildinni, Rodrigo Gomes Mateo. Rodri eins og hann er kallaður hefur verið meiddur í allt sumar en hann var einn lykilmanna Grindavíkur þegar liðið fór upp úr Inkasso deildinni í fyrra.

KR hafa ekki spilað í 13 daga en leik þeirra gegn FH var frestað vegna þátttöku FH í Evrópudeildinni. Síðasti leikur liðsins var gegn Val en leikurinn endaði með markalausu jafntefli.

Það er mikil veisla framundan í dag en heil umferð fer fram í Pepsi-deildinni í dag! Einum leik er nú þegar lokið en topplið Vals sigraði bikarmeistara ÍBV í Vestmannaeyjum, 3-2. Staða Vals á toppnum er orðin ansi góð

Sam Hewson, leikmaður Grindavíkur er í leikbanni í kvöld en hann er kominn með sjö áminningar í sumar. Í upphafi sumars spáði undirritaður því að hann yrði spjaldahæsti leikmaður Íslandsmótsins og er hann á góðri leið með það. Hann er að ég held með flest gulu spjöldin, eða er nálægt toppnum

Óskar Örn Hauksson er að snúa aftur á sinn gamla heimavöll, eða í raun ætti maður að segja sinn eldgamla heimavöll. Óskar lék með Grindvíkingum á árunum 2004-2006 við góðan orðstír en árið 2006 gekk hann til liðs við KR

Fyrri leikur liðanna í Vesturbænum var hörkuskemmtun en að lokum voru það Grindvíkingar sem stálu sigrinum á lokamínútunum. Markið skoraði að sjálfsögðu Andri Rúnar Bjarnason en það kom úr vítaspyrnu sem hann fiskaði sjálfur.

Það voru líklega fáir, ef einhverjir sem spáðu því fyrir tímabil, að eftir um 16 umferðir, þá yrði þessi leikur nánast úrslitaleikur um hvort liðið ætlar að taka þátt í Evrópubaráttunni. Margir spáðu KR-ingum góðu gengi í sumar og að Evrópusætið yrði þeirra. En með bikartitli ÍBV og slæmri byrjun KR er staða þeirra ekkert alltof björt. Sigur í kvöld getur hins vegar gert ansi margt.

Flestir spáðu Grindvíkingum beint niður í Inkasso-deildina aftur en ótrúleg fyrri umferð þeirra hefur skilað þeim í efri helminginn. Grindavík er í fjórða sæti með 24 stig, en KR situr í fimmta sætinu með 22 stig

Já komið þið sæl og blessuð og verið velkomin í textalýsingu á leik Grindavíkur og KR í Pepsi-deild karla.