Eins og áður sagði, þá munu einungis helstu atriði koma hér inn.

Hér á Húsavík er 5° hiti og upphitun leikmanna í fullum gangi. 20 mínútur í leik, tónlist á fóninum og fólk að mæta á völlinn.

Eins og sjá má hér til hliðar eru byrjunarliðin klár. Völsungur gerir eina breytingu frá leik sínum gegn Aftureldingu síðastliðinn föstudag. Guðmundur Óli Steingrímsson kemur inn fyrir Freyþór Hrafn Harðarson.

Nýju erlendu leikmennirnir byrja allir hjá Fram og Heiðar Geir Júlíusson sem kominn er heim í Fram byrjar einnig. Athygli vekur að Hlynur Atli Magnússon og Orri Gunnarsson byrja á bekknum.

Aðstæður hér á gervigrasinu á Húsavík eru tipptopp. Sólin skín og örlítill andvari með. Ég kem meira inn á hitastigið þegar nær dregur leik, það gæti verið hærra.

Bæði lið hefja svo leik í deildakeppninni um næstu helgi. Völsungur fær Aftureldingu í heimsókn í 1.umferð 2.deildar en Fram tekur á móti Selfossi í 1.umferð Inkassodeildar. Báðir þessir leikir eru laugardaginn 5.maí.

Fram hóf keppni í 1.umferð þetta árið. Fengu frændur sína úr Ármanni í heimsókn og tóku þá 6-0. Í 2.umferð mættu þeir GG úr Grindavík og slátruðu þeim 10-0. Þeir eru því á fínu bikarrönni komandi inn í þennan leik.

Völsungur hóf leika í 2.umferð. Fengu Tindastól í heimsókn og unnu 7-1 sigur sem síst var of stór. Eins og áður kom fram, þá eru þeir líka nýkrýndir Lengjubikarsmeistara B-deildar karla og það gæti komið fram nokkrum sinnum til viðbótar í dag.

32-liða úrslit Mjólkurbikarsins hafa farið vel af stað og töluvert af mörkum er komið í fyrstu leikina. 2.deildarlið Völsungs varð Lengjubikarsmeistari síðasta föstudag og mæta hér Inkasso-liði Fram sem fagnar einmitt 110 ára afmæli sínu í dag. Til lukku bláir!

Góðan daginn og velkomin í rjómablíðuna á Húsavíkurvelli! Hér verður bein textalýsing af aðaltriðum úr leik Völsungs og Framara.