Það eru flottar aðstæður hérna á Selfossi. Smá vindur, 11 stiga hiti og sólin er að gægjast fram. Spilað er á gervigrasinu því grasvöllurinn er ekki tilbúinn.

Dómari leiksins í dag er Kristján Már Ólafs og línuverðir honum til aðstoðar eru þeir Atli Haukur Arnarsson og Helgi Sigurðsson. Elías Már Guðnason er eftirlitsmaður KSÍ.

Mótið hefur farið brösulega af stað hjá liðunum í dag en af mjög mismunandi ástæðum.

Selfoss sem er nýliði í deildinni þetta árið byrjaði mótið með 8-0 tapi gegn Val á Origo vellinum að Hlíðarenda.

Á sama tíma hefur KR gengið illa að fá að byrja mótið því fyrsta leik liðsins við ÍBV var frestað vegna veðurs í eyjum um síðustu helgi og leiknum í dag sem átti að fara fram í gær var frestað um einn dag.

Leikurinn átti upphaflega að fara fram í gærkvöldi en var frestað útaf oddaleik Selfoss og FH í undanúrslitum handboltans sem var leikinn hér á Selfossi í gær.

Komiði sæl og verið velkomin í beina textalýsingu frá viðureign Selfoss og KR í annarri umferð Pepsi-deildar kvenna.

Leikurinn hefst klukkan 14:00 og fer fram á gervigrasvellinum á Selfossi.