Tíminn er að renna út en Þór/KA fær aukaspyrnu úti hægra megin. Andrea Mist sendir fyrir en boltinn svífur örlítið yfir pakkann.

Þór/KA heldur boltanum. Spilar aftur á miðvörð og keyrir svo aftur af stað. Sóknin endar á því að Hulda Ósk fær háa sendingu inn á teig en nær ekki að stýra honum á markið.

VÓ!

Þarna munar litlu að gestirnir bæti við marki. Guðný fær boltann í sig eftir fyrirgjöf. Einhverjir fengu flash back og sáu fyrir sér sjálfsmarkið sem hún skoraði á móti ÍBV í 2. umferð þegar boltinn hrekkur af henni og í átt að markinu.

Guðný ætlar þó að sjálfsögðu ekki að láta það koma fyrir aftur. Er fljót að vinna boltann, taka heilan utanfótarsnúning og koma boltanum frá.

Sandra María er komin aftur inná.

Æi. Þarna skella Sandra María og Andrea Mist saman eftir að hafa reynt við sama skallaboltann. Sandra María liggur eftir og þarf að fara útaf til aðhlynningar.

Þór/KA er búið að nota allar sínar skiptingar og þurfa mögulega að klára leikinn 10 á móti 11.

Lítið sem ekkert að frétta af FH-liðinu. Það má þó hrósa Anítu Dögg sem er búin að staðsetja sig vel í tvígang og koma vel út á móti til að hreinsa hættulegar stungusendingar.

Það er allt loft úr FH-ingum og gestirnir með öll völd á vellinum.

ÞRUMUSKOT!

Marjani lætur vaða utan teigs og Johanna þarf að hafa sig alla við til að verja boltann sem var á leiðinni eitthvað í áttina að samskeytunum.

Þarna slapp Bianca við spjald. Var eitthvað pirruð þegar FH fékk dæmt innkast og grýtti boltanum í jörðina.

Boltinn rúllar vel hjá Þór/KA hér í byrjun seinni hálfleiks.

Meira líf í Þór/KA þessar síðustu mínútur fyrri hálfleiks.

Jasmín Erla var að skalla stórhættulega fyrirgjöf aftur fyrir og Þór/KA fær horn.

FÆRI!

Sandra María sendir nöfnu sína eina í gegn.

Aníta kemur vel út á móti og lokar á Söndru Mayor. Boltinn týnist þó einhvern veginn á milli þeirra í baráttunni og Mayor fær annan séns. FH-ingar eru hinsvegar fljótar til baka og ná að stoppa borgarstjórann áður en hún finnur skotið.

JESSEN!

Þó FH hafi verið að færa sig upp á skaftið er alltaf stöðug hætta hinum megin þegar Mayorinn er annars vegar.

Hún finnur Söndru Maríu sem er með aðstoð í teignum en ákveður að reyna að komast að markinu sjálf. Tapar boltanum svo. Fyrirliðinn hefði átt að gera mikið betur þarna og spila á samherja.

FH er að reyna að finna jöfnunarmarkið. Reyna að setja boltann aftur fyrir vörn gestanna og það gengur bara ágætlega. Er búnar að komast í 2-3 hálfsénsa og nú var verið að dæma Marjani rangstæða - og það stóð ansi tæpt!

Það er barningur í þessu. Völlurinn greinilega þungur en það er samt ágætis hraði í leiknum.

FH-konur eru að sýna karakter eftir markið og eru að mæta Þór/KA af miklum krafti.

Eva Núra var að eiga geggjaða tæklingu þar sem hún vann boltann af Söndru Mayor.

Gestirnir stilla svona upp:

Johanna

Arna Sif - Lillý - Bianca

Hulda Björg - Andrea Mist - Ariana - Anna Rakel

Sandra María - Sandra Mayor - Margrét

Það er kannski ekki úr vegi að henda liðsuppstillingunum inn.

FH stillir svona upp:

Aníta

Erna - Guðný - Birta - Arna Dís

Selma Dögg - Jasmín

Helena - Eva Núra - Diljá Ýr

Marjani

VARSLA!

Selma Dögg fær langa sendingu inn á teig er allt í einu komin ein gegn nýliðanum í markinu.

Johanna gerir virkilega vel í að mæta Selmu og ver svo frá henni.

FH fær í kjölfarið horn en norðankonur ná að skalla frá.

GEGGJUÐ MÓTTAKA!

Marjani fær háan bolta í átt að teignum. Á frábæra fyrstu snertingu, tekur boltann með sér inná teig og lætur vaða.

Ekki alveg nógu gott skot sem Johanna ver.

FÆRI!

Sandra Mayor fær frábæra sendingu inn fyrir og er komin ein hægra megin í teignum. Setur boltann fyrir á Margréti sem var búin að gera vel í að draga sig frá varnarmanni en Selma Dögg mætti á fleygiferð og komst inn í sendinguna áður en illa fór.

Vel gert hjá Selmu sem er að byrja þennan leik af miklum krafti.

Gestirnir byrja þetta af krafti. Orkan sem þær keyptu sér í Bónus í Mosó á leiðinni í bæinn greinilega að skila sér.

Voru að vinna fyrstu hornspyrnu leiksins. Anna Rakel snýr fínan bolta inn frá hægri en Marjani rís hæst og gerir vel í að skalla boltann af hættusvæðinu.

Boltinn endar aftur fyrir og nú er það Andrea Mist sem spreytir sig frá hægri. Setur boltann á fjær þar sem Sandra Mayor er mætt en setur boltann framhjá úr þröngu færi.

Mayor með fín tilþrif úti hægra megin. Reynir bjartsýnisskot utan af velli og boltinn vel yfir.

FH fær aukaspyrnu á miðjum vallarhelmingi Þórs/KA. Draumastaður fyrir Guðný Árnadóttur og það fer um gestina.

Guðný hittir boltann þó ekki vel úr spyrnunni sem fer í vegginn og Þór/KA snýr vörn í sókn.