Ég var á leik á sunnudaginn í Garðabæ sem varð að algjörri sturlun í seinni hálfleik þegar Stjarnan skoraði 5 mörk á fimmtán mínútum. Væri alveg til í annan slíkan leik en bara með mörkum í báðum hálfleikjum.

Það eru tæpar 8 mínútur í að Einar Ingi Jóhannsson flauti leikinn á. Honum til aðstoðar eru Frosti Viðar Gunnarsson og Eðvarð Eðvarðsson.

Fylkismenn eru í 6.sæti deildarinnar með 11. stig en þeir unnu Keflvíkinga í síðustu umferð 2 - 0. Með sigri í kvöld gætu Fylkismenn jafnvel komist í það minnsta tímabundið í 3. sæti deildarinnar.

Skoðum aðeins stöðuna í deildinni. Heimamenn í Blikum eru í 2. sæti deildarinnar með 14 stig. En þeir unnu einmitt í síðustu umferð leik á móti Grindavík 0 - 2. En þá höfðu Blikar ekki unnið leik síðan í 3. umferð. En með sigri í kvöld og ef Valsmenn tapa stigi eða stigum í Eyjum að þá eru Blikar komnir í toppsætið.

Eins og sjá má að þá eru byrjunarlið liðanna komin hér inn til hliðanna.

Hjá Blikum dettur Arnþór Ari Atlason út vegna leikbanns og Elfar Freyr Helgason vegna meiðsla. Jonathan Hendrickx kemur inn í liðið ásamt Andra Rafn Yeoman. Hendrickx er að spila sinn fyrsta byrjunarliðsleik frá því hann hneig niður í leik gegn KR í Mjólkurbikarnum fyrir um tveimur vikum síðan.

Hjá Fylki koma Albert Brynjar Ingason og Valdimar Þór Ingimundarson inn í liðið fyrir Ragnar Braga Sveinsson og Jonathan Glenn. Sá síðarnefndi er á bekknum en Ragnar Bragi er ekki í hóp, líklegast þá vegna meiðsla.

HBG spáir jafntefli í Kópavoginum:
Hinn fagri bolti á móti stálinu úr Árbænum. Fegurðin og harkan jafna sig út og þetta fer líka jafntefli.

Hinn knái fréttamaður, Rússlandsfari og unnandi sixpensara, Henry Birgir Gunnarsson er spámaður 9.umferðar hér á Fótbolta.net og spáir hann því að niðurstaðan verði 1 - 1 jafntefli. Verð að viðurkenna að ég væri til í fleiri mörk en það.

Danskur sóknarmaður á leið til Blika?

Það kom fram í fréttum í gær að Blikar hafi gefið Hrvoje Tokic leyfi til þess að ræða við önnur lið og að þeir væru jafnframt í viðræðum við danskan sóknarmann um að spila með þeim í sumar.

Siðustu leikir liðanna í deild fóru fram árið 2016. Þar varð niðurstaðan 1 - 2 í leik í Lautinni og 1 - 1 á Kópavogsvelli. Hvað verður niðurstaðan í kvöld?

Breiðablik og Fylkir hafa leikið 44 leiki á vegum KSÍ samkvæmt tölfræði á heimasíðu sambandsins. Þar af hefur Breiðablik sigrað í 45% tilvika. Fylkir í 30% tilvika og hafa liðin gert jafntefli í 25% tilvika.

Eins og Jón Ársæll segir, komiði sæl og blessuð! Verið hjartanlega velkomin í beina textalýsingu frá leik Breiðabliks og Fylkis í 9. umferð Pepsí deildar karla í knattspyrnu sem fram fer á Kópavogsvelli kl. 19:15