Góðan og margblessaðan. Hér verður bein textalýsing frá leik Stjörnunnar og ÍBV í 17. umferð Pepsi-deildar karla.

Jóhann Laxdal tekur út leikbann hjá Stjörnunni í dag og Kennie Chopart fer líklega í hægri bakvörðinn í hans stað. Hörður Árnason er búinn að jafna sig af meiðslum og verður í vinstri bakverðinum. Garðar Jóhannsson hefur einnig jafnað sig af meiðslum sem hann varð fyrir í handbolta og hann kemur aftur inn í liðið. Mark Doninger byrjar hins vegar á varamannabekknum í dag.

Tonny Mawejje er í leikbanni hjá ÍBV og Andri Ólafsson tekur stöðu hans en hann hefur komið inn á sem varamaður í síðustu leikjum.

Tryggvi Guðmundsson er ennþá utan leikmannahóps hjá ÍBV en hann hefur ekki verið í hópnum síðan eftir að hann braut agabann á Þjóðhátíð í Eyjum í byrjun mánaðarins. Tryggvi æfir með Eyjamönnum en Magnús Gylfason þjálfari liðsins velur hann ekki í hópinn. Í dag eru til að mynda 3. flokks leikmennirnir Kristin Skæringur Sigurjónsson og Sigurður Grétar Benóýnsson í hópnum en ekki Tryggvi.

Fyrir leikinn er ÍBV með 26 stig í 3. sæti en Stjarnan er sæti neðar með 25 stig. Eyjamenn eiga einnig leik inni gegn FH á fimmtudag en þeir verða einfaldlega að sigra hér í dag til að halda lífi í titilvonum sínum.