Keflavík fær Fram í heimsókn í Pepsi-deild karla í knattspyrnu í kvöld og er þetta fyrsti leikur þeirra bláu undir stjórn Ríkharðs Daðasonar og Auðuns Helgasonar.

Fram situr í áttunda sæti, sætinu fyrir ofan Keflvíkinga. Keflavík vann báða deildarleikina gegn Fram á síðustu leiktíð og heimsóknina til Keflavíkur í fyrra vilja fæstir Framarar væntanlega ræða í þaula. Keflavík vann 5-0 og fylgdi þar eftir ágætum sigri í Laugardalnum í fyrri umferðinni, 2-0.

Breiðhyltingurinn Gunnar Jarl Jónsson dæmir leikinn í kvöld. Honum til aðstoðar með flöggin verða þeir Frosti Viðar Gunnarsson og Sigurður Óli Þórleifsson.

Ríkharður Daðason gerir enga breytingu á byrjunarliði Fram frá síðasta leik Þorvaldar Örlygssonar sem var sigurleikur gegn Val í bikarnum.

Tvær breytingar eru á byrjunarliði Keflavíkur frá síðasta leik í deildinni sem var gegn Val. Þeir Andri Fannar Freysson og Magnús Þórir Matthíasson koma í staðinn fyrir Samúel Kára Friðjónsson og Hörð Sveinsson.

Tónlistin er sett í háan styrk í Bítlabænum. Menn enn í gírnum eftir Keflavík Music Festival. Óli Geir er þó farinn af landi brott og verður ekki meðal áhorfenda í kvöld. Bæði lið hita upp af miklum móð.

Keflvíkingar eru að frumsýna nýja vallarklukku. Hún er glæsileg og vallarstjórinn bendir á að hún sé flottari en sú sem er á Laugardalsvelli. Ég get tekið undir það.

Eftirlitsmaður er Eyjólfur Ólafsson. Hann býst við rólegu kvöldi enda dómaratríóið allt skipað milliríkjadómurum. Dómarinn Gunnar Jarl var reyndar ekki á jólagjafalista Keflvíkinga um tíma en það er allt gleymt og grafið í dag.

Tómas Meyer frá Stöð 2 Sport er að sjálfsögðu mættur í sinn annan heimabæ og er hann fullur tilhlökkunar. Þegar ég bað hann um að spá fyrir um leikinn snérist hann í tólf hringi og sagði ómögulegt að spá fyrir um úrslitin.

Fyrir áhugasama má sjá nýju vallarklukkuna í Keflavík með því að smella hérna.

Fyrir leik voru áhorfendur látnir klappa fyrir Hemma Gunn sem féll frá í síðustu viku. Vallarþulurinn reyndar með ansi slæma tímasetningu og voru liðin enn að labba inn á völlinn þegar hann sagði fólki að klappa.