Sæl og velkomin í beina textalýsingu frá leik Selfoss og Völsungs.

Það verður eitthvað skrautlegt að lýsa þessum leik þar sem glugginn á fjölmiðlagámnum er rennandi blautur. Líklega tippa ég bara á hver gerði hvað

Síðast þegar þessi lið mættust á Húsavík lauk leiknum með 0-0 jafntefli. Hvorugt lið hefur verið að gera merkilega hluti síðan þá en þetta var aðeins annað stig Húsvíkinga í sumar.

Það er óhætt að segja að lið Völsungs hafi aðeins breyst frá því síðast þegar þessi lið mættust. Það eru 8 breytingar á byrjunarliðinu en eins og kunnugt er voru miklar breytingar á miðju sumri þegar skipt var um þjálfara.

Það er ljóst að það er gríðarleg stemming fyrir þessum leik. Það er einn krakki mættur í stúkuna nú þegar og tæpar tuttugu mínútur í leik.

Nei afsakið, krakkinn er farinn.

Spá fyrir leik úr fjölmiðlagámnum (sem er ekki beint hlutlaus):
Vallarkynnir: 6-0 Selfoss
Suðurland FM: 2-1 Selfoss
Fótbolti.net: 2-1 Selfoss
DJ: 3-0
Einar Glans: Spáir rigningu.

Stemmingin er að magnast en rétt í þessu var einhver að labba í gegnum stúkuna. Mesta sem gerst hefur síðan krakkinn var þarna áðan.

Það er fámennt en hrikalega góðmennt hérna. Söngvararnir í Skítamóral, OFL, Oxford og Riff Redhead komu hérna allir saman.

Skömmu eftir að þeir settust heyrðist úr stúkunni "Það eru átta í stúkunni" sem er ekki fjarri lagi. Liðin er komin út á völlinn og leikurinn er að byrja.