Velkomin með Fótbolta.net á Nettóvöllinn í Keflavík! Maður er búinn að koma sér fyrir hér í fréttamannaaðstöðu Keflvíkinga eftir gott Road-Trip með Tómasi Meyer. Framundan er rosalega mikilvægur leikur vægast sagt. Fallbaráttuslagur af bestu gerð.

Skagaliðið situr eitt á botni deildarinnar með 8 stig og því nokkuð ljóst að leikurinn í kvöld verður að vinnast ef ekki á illa að fara. Síðasti leikur Skagamanna var 26. ágúst síðastliðinn gegn liði Stjörnunnar þar sem þeir gulklæddu áttu fínan leik þrátt fyrir rýra uppskeru.

Keflavík er í tíunda sæti með 17 stig, þremur stigum meira en Víkingur Ólafsvík sem er í fallsæti. Það er því stríðsleikur framundan á Nettóvellinum í Keflavík.

"Menn er bara vel stemmdir fyrir leiknum í kvöld. Við ætlum að sjálfsögðu að leggja okkur alla fram í þennan leik, það er í rauninni bara nú eða aldrei hjá okkur og við lítum á þessa síðustu leiki sem hreina bikarúrslitaleiki," segir Ármann Smári Björnsson, leikmaður ÍA, við heimasíðu félagsins.

Davíð Snorri Jónasson, þjálfari Leiknis:
Kristján hefur fengið góðan tíma til að undirbúa sína menn fyrir þennan leik. Keflavík vinnur þetta 2-1.

"Við höfum þetta í okkar höndum núna þegar við mætum ÍA og Þór. Þetta eru allt öðruvísi leikir heldur en sá síðasti þegar við mættum Stjörnunni. Það eru meiri slagsmál og spennustigið er meira. Þetta verða mikil átök," sagði Kristján Guðmundsson, þjálfari Keflavíkur, við Fótbolta.net á dögunum.

Byrjunarliðin eru klár hér til hliðar.

Keflavík gerir eina breytingu frá því í síðasta leik en Ray Anthony Jónsson er ekki með í dag. Daníel Gylfason tekur stöðu hans á kantinum en hann er í fyrsta skipti í byrjunarliði í Pepsi-deildinni.

Daníel er uppalinn Keflvíkingur en hann lék með Njarðvík fyrri hluta sumars í 2. deildinni.

Hjá ÍA kemur Garðar Bergmann Gunnlaugsson aftur inn í liðið fyrir Eggert Kára Karlsson sem er í leikbanni. Arnar Már Guðjónsson kemur einnig inn fyrir Jón Vilhelm Ákason.

Verið er að blasta metaltónum meðan liðin hita upp. Það er að sjálfsögðu rok en völlurinn lítur vel út. Ég rölti yfir hann áðan.

Kópavogsdjúsinn sem fréttamönnum er boðið upp á þegar Breiðablik á heimaleiki er löngu orðinn frægur. Í Keflavík er boðið upp á vatn í tveggja lítra Pepsi-flösku. Flaskan er kölluð "Keflavíkurlandinn" meðal gárunga enda með mikið landa-yfirbragð yfir sér.

Að vanda í Keflavík er það Tómas Meyer sem spáir fyrir um lokatölur:
3-1 fyrir Keflavík. Nokkuð öruggt og þægilegt.

Fyrir þá lesendur sem hyggjast kaupa eða selja fasteign þá bendum við á auglýsinguna hér fyrir ofan textalýsinguna. Ekki verður þó hægt að hafa samband við fasteignasalann vinstra megin fyrr en eftir leik í kvöld.

Liðin ganga út á völlinn. Það verða ekki slegin nein áhorfendamet hér í Keflavík í kvöld. Guðni Már Harðarson prestur styður sína menn í ÍA í blíðu og stríðu og er mættur. Annars eru stuðningsmenn ÍA fjórtán samkvæmt talningu Tómasar Meyer.