Sérfræðingarnir sem spáðu eru:
Aðalsteinn Víglundsson, Arnar Björnsson, Bjarni Jóhannsson, Eyjólfur Sverrisson, Guðmundur Hreiðarsson, Guðmundur Steinsson, Halldór Einarsson, Heimir Karlsson, Hermann Gunnarsson, Kristinn R. Jónsson, Logi Ólafsson, Pétur Ormslev, Steinar Guðgeirsson, Víðir Sigurðsson.

Hvað segir Bjarni?
Bjarni Jóhannsson þjálfari Breiðabliks er sérstakur álitsgjafi okkar um Landsbankadeildina. Bjarni þjálfaði síðustu 6 tímabil í efstu deild hér á landi, hjá Fylki, ÍBV og Grindavík en var áður aðstoðarþjálfari hjá Fram og þjálfari Breiðabliks í efstu deild.

Styrkleikar
Framarar hafa heldur betur endurnýjað liðið og leitað á náðir frænda okkar frá Færeyjum til að styrkja liðið. Þeir eru með mjög þéttan leikmannahóp, eru líkamlega sterkir og ég tel að varnarleikur þeirra verði aðallinn hjá liðinu í sumar auk þess sem að þeir verða mjög sterkir í föstum leikatriðum.

Veikleikar
Leikaðferð þeirra er svolítið spurningarmerki en með nýjum þjálfara þarf alltaf að gefa mönnum tíma til að móta liðið sitt.

Lykilmaður að mati Bjarna
Ég held að lykilmaður þeirra í sumar verði Ingvar Ólafsson en hann er akkeri í þessu Framliði.

Leikmaður sem að gaman verður að fylgjast með að mati Bjarna
Það verður gaman að fylgjast með endurkomu Ríkharðs Daðasonar. Verði hann heill verður sóknarleikur liðsins beittur og markviss en verði hann verður mikið meiddur þá gætu þeir lent í vandræðum.

Hin hliðin:
Andri Steinn Birgisson leikur ýmist sem kant, miðjumaður eða framherji. Hann lék með Fram, Fylkir og Fjölni í yngri flokkunum og með Fjölni og Fylki í upphafi meistaraflokks. Eftir að hafa leikið með Fylki á undirbúningstímabilinu í fyrra þá fór Andri á láni til Aftureldingar þar sem að hann lék níu leiki og skoraði eitt mark áður en að hann kom aftur til Fylkis um mitt sumar. Í janúar í ár fór hann svo til Fram og hefur verið að skora grimmt og leika vel fyrir liðið á undirbúningstímabilinu en þess má geta að kappinn á tvo landsleiki að baki með U-19 ára liði Íslands. Smelltu hér til að lesa viðtalið við Andra Stein.  Við bendum einnig  á að sum nöfnin í leikmannalista Fram bera tengla sem vísa á viðtöl við þá ef smellt er.

Þjálfarinn:
Rúmeninn Ion Geolgau þjálfar Fram í sumar.  Geolgau er 42ja ára gamall og spilaði 24 landsleiki fyrir rúmenska landsliðið á sínum tíma. Hann tók þátt í mörgum stórmótum með liðinu og var fastamaður í landsliðinu um 10 ára skeið. Hann lék einnig fjölda landsleikja með öllum yngri landsliðum Rúmeníu. Hann lék um árabil hjá einu stærsta liði landsins, Craiova. Geolgau snéri sér að þjálfun fyrir nokkrum árum og hóf ferilinn sem þjálfari Constructorul Craiova í Rúmeníu en stýrði svo HB í Færeyjum frá 1998 til 2002 og B36 á síðasta tímabili. Á meðan hann þjálfaði í Færeyjum landaði hann tveimur Færeyjarmeistaratitlum og jafnmörgum bikarmeistaratitlum.   Aðstoðarmaður hans er Jörundur Áki Sveinsson sem þjálfaði síðast lið Breiðabliks í fyrrasumar en hafði áður náði miklum árangri með kvennalið Breiðabliks auk þess sem hann hefur þjálfað kvennalandslið Íslands.

Völlurinn:
Framarar leika heimaleiki sína á þjóðarlekvangnum í Laugardal og er eina félagið á Íslandi sem það gerir þetta sumarið.   Tvær stúkur eru sitthvoru megin við völlinn og taka þær saman um 7 þúsund áhorfendur.  Að auki við það komast um 7000 áhorfendur í stæði. Án efa glæsilegasti völlur landsins og ef leita á leiða til að setja út á eitthvað þá hlýtur það að vera vallarklukkan sem er kominn tími á.

Klúbburinn:
Stuðningsmannaklúbburinn heitir Framherjar og kostar á bilinu 1000-2500 krónur á mánuði að vera í honum.   Innifalið í því eru miðar á heimaleiki félagsins, Kaffi og með því í hálfleik og Fram jakki sem er afhentur fyrir mót.

Lukkudýr:
Fram er ekki með lukkudýr

Aðgangseyrir:
Börn 10 ára og yngri frítt,  Börn 11-16 ára kr. 300.- Fullorðnir kr. 1.200.-

Leikskrá:
Gefin er út A5 leikskrá fyrir leiki félagsins

Vefsíðumál:
Vefsíða Framara, Fram.is er mjög virk.   Í langflestum ef ekki öllum tilfellum má treysta á að hún birti fyrst allar fréttir um Fram auk þess sem mikið efni má nálgast á síðunni.  Spjallborðið er með þeim virkari hjá liðunum í deildinni.

Stuðningsmenn:
Meðal þekktra stuðningsmanna Framara eru: Davíð Oddsson forsætisráðherra, Friðrik Þór Friðriksson leikstjóri, Einar Kárason rithöfundur, Hreimur Örn Heimisson poppari, Alfreð Þorsteinsson, Jón Steinar Guðlaugsson lögmaður, Jón Sigurðsson úr Idol, Stefán Pálsson formaður herstöðvarandstæðinga, Ómar Ragnarsson, Helgi Björnsson rokkari, Valtýr Björn Valtýsson íþróttafréttamaður, Steingrímur Ólafsson blaðamaður, Þorsteinn Joð, Snorri Már Skúlason, Þorgeir Ástvaldsson útvarpsmaður.

haflidi@fotbolti.net & maggi@fotbolti.net