Hvað segir Bjarni?
Bjarni Jóhannsson þjálfari Breiðabliks er sérstakur álitsgjafi okkar um Landsbankadeildina. Bjarni þjálfaði síðustu 6 tímabil í efstu deild hér á landi, hjá Fylki, ÍBV og Grindavík en var áður aðstoðarþjálfari hjá Fram og þjálfari Breiðabliks í efstu deild.

Styrkleikar
Að mínu mati verður Grindavíkurliðið nokkuð sprækt í sumar. Grétar Hjartarson kemur aftur inn eftir að hafa verið meiddur á síðasta tímabili og þá hafa þeir fengið Orra Frey Óskarsson frá Þór. Svo eru þeir að fá Austantjaldsmenn (Serba) og Albert kemur aftur í markið svo að þeir eiga eftir að styrkjast verulega. Ég tel að sóknarleikurinn verður þeirra aðall í sumar.

Veikleikar
Þeir missa Ólaf Örn Bjarnason og þá gæti það tekið nokkrar umferðir fyrir liðið að ná sér á strik og þá gæti varnarleikurinn orðið höfuðverkur.

Lykilmaður að mati Bjarna
Tvímælalaust Sinisa Kekic og ég tala nú ekki um ef hann ákveður að láta hann í vörnina.

Leikmaður sem að gaman verður að fylgjast með að mati Bjarna
Það verður mjög gaman að fylgjast með endurkomu Grétars Hjartarsonar í þetta lið, það verður athyglisvert að sjá það.

Hin hliðin:
Snorri Birgisson er tvítugur markvörður sem að á tvo leiki að baki fyrir U-17 ára landslið Íslands. Hann var einungis fimmtán ára þegar að hann spilaði sinn fyrsta meistaraflokksleik með Víkingi Ólafsvík. Snorri hefur leikið með Keflavík, Fram og seinasta sumar með Víkingi en nú er hann kominn til Grindavíkur. Þegar að Snorri var sextán ára fékk hann tilboð frá Charlton eftir að hafa verið til reynslu hjá liðinu eftir Evrópumót U-16 ára landsliða. Snorri hafnaði tilboðinu þar sem að hann vildi ljúka framhaldsskólanámi fyrst.  Smellið hér til að lesa viðtalið við Snorra.  Við bendum einnig á að sum nöfnin í leikmannalista Víkinga bera tengla sem vísa á viðtöl við þá ef smellt er.

Þjálfarinn:
Zeljko Sankovic fæddist í Króatíu og þótti strax liðtækur í fótbolta. Hann var einn af betri leikmönnum Króata vann marga titla með yngri landsliðum Króata. Eftir að ferli hans sem leikmanni lauk sneri Zeljko sér að þjálfun og útskrifaðist meðal annars frá háskólanum í Zagreb með hæstu einkunn í knattspyrnuþjálfun. Hann þjálfaði 14-18 ára landslið Króata og voru þar menn eins og Davor Suker og Robert Jarni svo einhverjir séu nefndir. Zeljko þjálfaði meðal annars í Kýpur áður en að hann kom til Íslands árið 1997. Zeljko fór á Ísafjörð að þjálfa eftir að hafa verið í smá pásu frá þjálfun árin á undan. Hann var yfirþjálfari yngri flokka hjá ÍBV 1998-2000 og svo hjá Val frá 2000 til ársins 2002 þegar að Zeljko fór til Víkings. Þar þjálfaði hann annan flokk og var á síðasta tímabili aðstoðarmaður Sigurðar Jónssonar og stýrðu þeir Víkingi saman upp í úrvaldeild. Zeljko tók svo við Grindavík síðasta haust og mun stýra liðinu í frumraun sinni sem þjálfari í Landsbankadeildinni.

Völlurinn:
Völlurinn í Grindavík tekur 2500 manns en glæsileg stúka þeirra tekur 1500 manns.  Stúkan var vígð á þjóðhátíðardegi Íslendinga, 17. júní 2001.

Klúbburinn:
Tvenns konar aðgangur er að klúbbi Grindavíkur.  Annars vegar er hægt að greiða 9000 krónur og þá er aðeins innifalinn aðgangur á heimaleiki félagsins.  Hinsvegar er hægt að greiða 30 þúsund krónur, innifalið í því er aðgangur á alla heimaleiki, súpa og brauð fyrir leik, kaffi í hálfleik og merkt sæti í stúku.  Svo koma gestir í heimsókn og fræðamenn um ýmislegt svipað og gert er í KSÍ klúbbnum.

Lukkudýr:
Grindvíkingar hafa ekkert lukkudýr enn sem komið er en það mál er þó í vinnslu án þess þó að nafn sé komið á dýrið.

Aðgangseyrir:
Aðgangseyrir á leiki Grindavíkur er 1200 krónur

Leikskrá:
Grindavík mun gefa út eina leikskrá fyrir tímabilið sem gildir fyrir það allt.

Vefsíðumál:
UMFG.is, þrátt fyrir að vera dálítið gamaldags í útliti sinnir hún hlutverki sínu vel.  Nægar upplýsingar er að finna á henni og fréttaflutningur er lifandi þó hann mætti stundum vera meiri.  Spjallborðið er ekki líflegt.

Stuðningsmenn:
Meðal þekktra stuðningsmanna Grindvíkinga eru Idolstjarnan Kalli Bjarni, Dagbjartur Einarsson útgerðarkóngur.

haflidi@fotbolti.net & maggi@fotbolti.net