Sérfræðingarnir sem spáðu eru:
Aðalsteinn Víglundsson, Arnar Björnsson, Bjarni Jóhannsson, Eyjólfur Sverrisson, Guðmundur Hreiðarsson, Guðmundur Steinsson, Halldór Einarsson, Heimir Karlsson, Hermann Gunnarsson, Kristinn R. Jónsson, Logi Ólafsson, Pétur Ormslev, Steinar Guðgeirsson, Víðir Sigurðsson.

Hvað segir Bjarni?
Bjarni Jóhannsson þjálfari Breiðabliks er sérstakur álitsgjafi okkar um Landsbankadeildina. Bjarni þjálfaði síðustu 6 tímabil í efstu deild hér á landi, hjá Fylki, ÍBV og Grindavík en var áður aðstoðarþjálfari hjá Fram og þjálfari Breiðabliks í efstu deild.

Styrkleikar
Ég tel að Skaginn verði Íslandsmeistari í ár. Ég byggi það á því að þeir hafa svipaðan mannskap og í fyrra og hafa heldur styrkst með komu Haraldar Ingólfssonar sem að var einn alskemmtilegasti sóknarmaður áður en að hann fór í atvinnumennskuna. Ég tel að Skaginn muni ekki eiga slæma byrjun eins og í fyrra og það mega þeir náttúrulega alls ekki. Þeir eru mjög vel mannaðir með mjög gott byrjunarlið. Þetta er örlítið spurningarmerki með Grétar Rafn sem að er erlendis núna en verði hann með tel ég að fátt geti stoppað ÍA. Þetta eru strákar sem að hafa verið lengi saman flest allir. Þeir hafa spilað á þessum kjarna undanfarin ár, flestir þeirra eru af Skaganum sem að hefur alltaf reynst vel þ.e.a.s flestir leikmennirnir eru uppaldir á Akranesi.

Veikleikar
Þeir verða stundum svolítið pirraðir og óþolinmóðir þegar að allt gengur ekki upp en ef að þeir laga það og verða aðeins agaðari í leik sínum þá tel ég að þeir hampi titlinum í haust.

Lykilmaður að mati Bjarna
Það er tvímælalaust Gunnlaugur Jónsson hann hefur verið leiðtogi liðsins í mörg ár. Afar traustur leikmaður.

Leikmaður sem að gaman verður að fylgjast með að mati Bjarna
Grétar Rafn Steinsson verði hann í liðinu.

Hin hliðin:
Guðjón Heiðar Sveinsson er örfættur og leikur ýmist á vinstri kanti eða í vinstri bakverði. Hann kom til ÍA árið 1998 frá Hvöt á Blönduósi þar sem að hann lék á sínum yngri árum. Guðjón á alls sextíu leiki að baki með meistaraflokki ÍA og hefur skorað í þeim níu mörk en hann skoraði fjögur mörk í sautján leikjum með liðinu í Landsbankadeildinni í fyrra. Smelltu hér til að lesa viðtalið við Guðjón.  Við bendum einnig  á að sum nöfnin í leikmannalista ÍA bera tengla sem vísa á viðtöl við þá ef smellt er.

Þjálfarinn:
Gamli jaxlinn Óli Þórðar hefur komið víða við á sínum ferli en þrátt fyrir það hefur hann verið gallharður Skagamaður allan tímann.  Hann hóf sinn þjálfunarferil hjá Fylki en þar þjálfaði hann við góðan orðstír 1998-1999. Ólafur tók síðan við þjálfun ÍA fyrir síðasta leik liðsins haustið 1999 og hefur hann verið þjálfari liðsins síðan. Undir hans stjórn hefur ÍA einu sinni orðið Íslandsmeistari, tvisvar sinnum bikarmeistari og deildabikarmeistari í fyrra.

Völlurinn:
Akranesvöllur tekur í heildina um 6000 áhorfendur.  Stúkan sem er öðrum megin við völlinn tekur 570 í sæti en auk þess er pláss fyrir áhorfendur allt í kringum völlinn meðal annars í grasbrekkum.

Klúbburinn:
Skagamenn hafa engan stuðningsmannaklúbb

Lukkudýr:
Lukkudýr Skagamanna heitir Gulur og er gormur.

Aðgangseyrir:
Börn 10 ára og yngri frítt,  Börn 11-16 ára kr. 300.- Fullorðnir kr. 1.200.-

Leikskrá:
Engin leikskrá er gefin út fyrir leiki ÍA.

Vefsíðumál:
Skagamenn eru langduglegastir á netinu af öllum liðum landsins.  Við getum bent á fjórar síður sem fjalla um liðið sem er meira en um nokkuð annað lið deildarinnar.  Opinbera síðan,  ÍA.is/KIA, er oftast fyrst með fréttirnar af liðinu, er með góða umfjöllun um leikmenn og fleira.  Spjallborðið er nýtt og af bestu sort.  Annað af tveimur félögum með gott spjallborð.   Stuðningsmannasíðurnar eru svo 3.  Gulir.is er með virkasta spjallborðið sem þó er gamaldags, annar tilgangur síðunnar er enginn nema að linka sig á aðrar síður.   Skagamenn.com birtir svo pistla og greinar.  Þriðja síðan, Freewebs.com/IAUK er svo ensk og sá sem heldur henni úti er Englendingur sem hefur aldrei séð liðið spila eða komið til Íslands en heldur þó ástfóstri við liðið þótt undarlegt sé.  Síðan hans er með ágætum, reglulegar fréttir og skákar sumum af opinberum síðum liðanna í Landsbankadeildinni!

Stuðningsmenn:
Meðal þekktra stuðningsmanna ÍA eru: Brynjólfur Þór Guðmundsson blaðamaður á Fréttablaðinu, Jóhann Ársælsson alþingismaður, Gísli Gíslason bæjarstjóri, Óli Palli dagskrárgerðarmaður á Rás 2, Gunni Sig bakari, Valdimar K Friðriksson varaþingmaður, Árni Ibsen rithöfundur, Jakob Einarsson leikari, Gísli S. Einarsson varaþingmaður, Benedikt Helgason bakari á Akureyri.

haflidi@fotbolti.net & maggi@fotbolti.net & olingi@fotbolti.net