Sérfræðingarnir sem spáðu eru:
Aðalsteinn Víglundsson, Arnar Björnsson, Bjarni Jóhannsson, Eyjólfur Sverrisson, Guðmundur Hreiðarsson, Guðmundur Steinsson, Halldór Einarsson, Heimir Karlsson, Hermann Gunnarsson, Kristinn R. Jónsson, Logi Ólafsson, Pétur Ormslev, Steinar Guðgeirsson, Víðir Sigurðsson.

Hvað segir Bjarni?
Bjarni Jóhannsson þjálfari Breiðabliks er sérstakur álitsgjafi okkar um Landsbankadeildina. Bjarni þjálfaði síðustu 6 tímabil í efstu deild hér á landi, hjá Fylki, ÍBV og Grindavík en var áður aðstoðarþjálfari hjá Fram og þjálfari Breiðabliks í efstu deild.

Styrkleikar
KR-ingar eru með stóran og fjölmennan leikmannahóp. Þeir eru vel mannaðir og hafa farið á því að mínu mati undanfarin ár. Það sem að er athyglisvert hjá KR að ungir og mjög efnilegir leikmenn hafa verið að fá tækifæri á undirbúningstímaiblinu og verður gaman að sjá hvort að þeir fái séns þegar að út í alvöruna er komið. Þá verður einnig mjög gaman að fylgjast með sóknarleik KR sem að hefur verið mjög sprækur á undanförnum árum þegar að allir hafa verið heilir.

Veikleikar
Það sem að getur sett strik í þetta hjá þessum stóra og sterka leikmannahóp er að það hefur verið alltof mikið af meiðslum hjá þeim og þeir hafa getað notað alltof fáa leikmenn á undirbúningstímabilinu til að móta liðið og gera það að alvöruliði. Það er helsti veikleikinn hjá þeim.

Lykilmaður að mati Bjarna
Kristján Finnbogason markvörður og fyrirliði liðsins. Það mun mæða mikið á honum og hann mun draga vagninn hjá þeim, kominn í landsliðið og hann verður lykilmaður hjá KR.

Leikmaður sem að gaman verður að fylgjast með að mati Bjarna
Það er Theódór Elmar Bjarnason, maður veit ekki hversu nálægt hann stendur en þar er mjög efnilegur leikmaður á ferð. Einnig Sölvi Davíðsson og þetta eru strákar sem að vert er að fylgjast með ef að þeir fá sénsinn.

Hin hliðin:
Miðjumaðurinn Kristinn Hafliðason hefur spilað með ýmsum liðum. Eftir að hafa spilað með Fram, Víkingi og ÍBV hér heima og meðal annars unnið Íslandsmótið með ÍBV þá spilaði Kristinn í nokkra mánuði með þýska liði Salgau. Eftir það kom hann aftur til ÍBV en í janúar 2000 gekk hann til liðs við norska liðið Raufoss. Þar hætti hann sumarið 2001 og gekk til liðs við KR þar sem að hann spilar nú. Hann hefur unnið marga bikara á ferlinum og einn þeirra í fyrra þegar að hann sigraði Íslandsmótið með KR en Kristinn lék alla átján leikina með liðinu í Landsbankadeildinni og skoraði í þeim tvö mörk. Hann á einn A-landsleik að baki með Íslendingum, sex leiki með U-21 árs landsliðinu og tvo með U-19 ára landsliðinu. Smelltu hér til að lesa viðtalið við Kristinn.  Við bendum einnig  á að sum nöfnin í leikmannalista KR bera tengla sem vísa á viðtöl við þá ef smellt er.

Þjálfarinn:
Willum Þór Þórsson er farsæll þjálfari.Hann er eini íslenski þjálfarinn sem hefur stjórnað liði til sigurs í öllum deildum.  Hann kom til KR fyrir tímabilið í hittifyrra eftir að hafa stýrt Haukum upp í 1. deildina og á sínu fyrsta ári hjá KR stjórnaði hann sínu liði til sigurs í deildinni og endurtók leikinn svo í fyrra er liðið varð Íslandsmeistari.  Willum hafði áður unnið 1. deild með Þrótti 1997, 3 deild með Haukum 2000 og 2. deild með Haukum 2001.

Völlurinn:
Þrátt fyrir að fá sæti séu á KR vellinum og aðstaða áhorfanda ekki eins og best þekkist er umgjörðin í kringum leiki liðsins langflottust í deildinni.   Alls komast 3500 áhorfendur á KR völlinn en þar af eru aðeins 550 sæti.

Klúbburinn:
Ítarlegar upplýsingar um klúbbinn og hvað er í boði fyrir hvern aðgang má lesa hér.

Lukkudýr:
Rauða ljónið er elsta og þekktasta lukkudýrið í deildinni.   Mætir á alla heimaleiki og skemmtir áhorfendum, nokkuð sem undirstrikar frábæra umgjörð hjá félaginu.

Aðgangseyrir:
Börn 10 ára og yngri frítt,  Börn 11-16 ára kr. 300.- Fullorðnir kr. 1.200.-

Leikskrá:
Engin leikskrá er gefin út fyrir leiki KR.

Vefsíðumál:
KR er með vefsíðu undir KR.is en án þess að draga neitt úr þá er skömm að henni.  Að ríkasta félag deildarinnar skuli vera með eldgamla vefsíðu sem ekkert er uppfærð er mjög undarlegt.   Spjallborðið er mjög gamaldags en einnig mjög virkt enda sjá stuðningsmennirnir um að uppfæra það en ekki félagið.

Stuðningsmenn:
Meðal þekktra stuðningsmanna KR eru: Björgólfur Guðmundsson, Björgólfur Thor, Bubbi Morthens poppstjarna, Ingibjörg Sólrún Gísladóttir varaþingkona, Bogi Ágústsson fréttamaður, Þröstur Emilsson fréttamaður, Mörður Árnason þingmaður, Egill Helgason, Haukur Hólm, Geir H. Haarde fjármálaráðherra, Óli Björn Kárason, Gunnar Smári Egilsson ritstjóri, Bjarni Felixson íþróttafréttamaður. 

haflidi@fotbolti.net & maggi@fotbolti.net