Vonbrigði fyrir Val að leikurinn tapaðist illa
Þorsteinn Halldórsson, landsliðsþjálfari, var spurður út í fyrri leikinn á fréttamannafundi. Er það áhyggjuefni að íslenskt félagslið tapi 4-0 í Meistaradeildinni?

„Fyrst og fremst eru þetta vonbrigði fyrir Val að leikurinn tapist illa. Fyrri hálfleikurinn var allt í lagi en seinni hálfleikurinn var ekki þeirra besti," sagði Steini.

„Austurríska liðið er fjórtánda hæst á styrkleikalistanum og Valur er í 48. sæti... þetta eru þá ekki í sjálfu sér óeðlileg úrslit. Austurríska liðið er gott og hefur verið gott í mörg ár. Þær hafa tapað einum titli á síðustu tíu árum eða eitthvað svoleiðis. Þetta er gott lið og hefur alltaf verið í baráttunni. Þær eru með góða leikmenn og þær eru gott atvinnumannalið, en þetta eru vonbrigði fyrir Val."

Þær nýttu sín færi
„Það er hægt að segja helling,“ sagði Pétur Pétursson, þjálfari Vals, eftir tapið í fyrri leiknum.

„Mér fannst við spila þetta vel í fyrri hálfleik, við lokuðum vel á þær. Ódýrt mark sem við fáum á okkur svo fáum við annað markið á okkur sem mér fannst ódýrt líka, bara langskot sem þær skora úr. Þá fannst mér svona dofna yfir öllu hjá okkur“

Í stöðunni 2-0 var eins og Valskonur hefðu hreinlega gefist upp og þær fá á sig önnur tvö mörk á tíu mínútna kafla. Þá var holan orðin ansi djúp og það verður erfitt að skríða upp úr henni.

„Ég ætla að taka það fram að þetta er gott lið, þetta er klínískt lið og þær nýttu sín færi. Ég held þær hafi átt kannski fjögur skot á markið og þær skora fjögur mörk. Við náttúrulega vorum að reyna ákveðna hluti og stundum gengur það upp og stundum ekki.“

Svekkt með frammistöðuna í fyrri leiknum
„Bara hundfúl, ég er virkilega svekkt með okkar frammistöðu,“ sagði Anna Björk Kristjánsdóttir, leikmaður Vals, eftir fyrri leikinn.

„Mér fannst þegar við fáum á okkur annað eða þriðja markið hausinn á okkur detta og við erum að svekkja okkur sem að má ekkert í svona leikjum, þá refsa þær. Mér fannst 4-0 ekki sýna getumuninn á þessum liðum en þær mættu til leiks og við ekki þannig að það fór svona.“

„Við erum að klúðra einföldum sendingum, gefum þeim allt of auðvelda leið að markinu okkar og vorum að pirra okkur eftir hverja sendingu og svekkja okkur í staðinn fyrir að bregðast við og reyna að vinna hann strax aftur. Ég held að það hafi verið smá pirringur eftir einhvern tíma og við verðum einhvernveginn að halda okkur á jörðinni, setja hausinn niður og gera vinnuna og reyna að fá það sem við getum úr þessum leik“ segir Anna þegar hún var spurð að því hvort að leikurinn hafi farið frá þeim þegar hausinn fór.

Í miðjum seinni hálfleik kölluðu Valsarar í liðsfund á vellinu og aðspurð hvað hafi verið sagt þar svarar hún:

„Mér fannst það helsta sem við þurftum að breyta var nálgunin okkar á leiknum. Við þurftum bara að rífa hausinn upp, kassann út og keyra á þær. Í svona leikjum þá skiptir markatalan máli þannig ef við hefðum náð að pota inn einu eða tveimur mörkum þá hefði það hjálpað okkur fyrir seinni hálfleikinn. Það var bara að þétta okkur sækja á þær, þora að keyra á þær.“

Það er gríðarlega erfitt verkefni framundan fyrir Valskonur
Það er gríðarlega erfitt verkefni framundan fyrir Valskonur

Liðið mætir St. Pölten í síðari leik liðanna í undankeppni Meistaradeildarinnar í Austurríki.

Þær austurrísku fóru illa með Valskonur hér heima og eru með 4-0 forystu eftir fyrri leikinn svo það þarf mikið að gerast til að Valur komist áfram.

Fyrri leikurinn:

Valur 0 - 4 SKN St. Pölten
0-1 Sarah Mattner ('13 )
0-2 Rita Schumacher ('53 )
0-3 Valentina Mädl ('59 )
0-4 Valentina Mädl ('63 )
Lestu um leikinn