Leikurinn var mjög jafn nánast allan leikinn, ef eitthvað er þá voru HK-ingar hættulegri. HK-ingar komu sér í góð færi en þeir náðu ekki að nýta færin sem þeir fá, einungis búnir að skora 1 mark í þessum fyrstu fjórum umferðum. Frábært skyndisóknarmark sem skildi liðin að í dag. Leikurinn hefði getað dottið á báða vegu.

Fyrir utan markið var það þegar Tumi Þorvarsson slapp í gegn eftir frábæra sendingu frá Þorsteini Aroni, Tumi lyfti boltanum yfir Eskelinen og hafnaði í þverslánni í stöðunni 0-0. Einnig er vert að minnast á þegar Atli Þór Jónasson fór með sólann hátt upp og fór í Eið Aron sem þurfti að víkja að velli í kjölfarið.

Vestramenn tengja saman tvo sigra og eru komnir með 6 stig og slíta sig þar með frá neðstu liðunum. HK eru neðstir á stigatöflunni með 1 stig, útlitið er ekki bjart fyrir lið fólksins.

Brynjar Snær á slæm mistök í marki Vestra, kærulaus utanfótar sending fram á við sem fer beint á Silas og úr Vestramenn komast í fjórir á tvo stöðu sem Vestramenn skora úr, dýrkeypt mistök þarna.

Pétur Guðmundsson og aðstoðarmenn hans áttu ágætis dag. Spurning hvort að hann ætti að gefa rautt þegar Atli Þór fór í Eið Aron. Annars heilt yfir ágætis leikur hjá tríóinu.