Það var mikil dramatík þegar Spánn og Frakkland áttust við á Hlíðarenda í undanúrslitum Evrópumóts U17 kvenna.

Staðan var lengi markalaus en Frakkland komst yfir eftir vandræðagang í varnarleik Spánar. Mínútu fyrir leikslok kom svo dramatískt jöfnunarmark en markvörður Frakklands var illa staðsettur og missti boltann yfir sig.

Farið var beint í vítaspyrnukeppni og þar fengu áhorfendur heldur betur allan pakkann. Á endanum vann Spánn 4-3 sigur í vítaspyrnukeppninni.

Spænska liðið mætir sigurvegara úr leik Sviss og Þýskalands í úrslitum en sá leikur verður á Hlíðarenda klukkan 19:00 í kvöld.

Úrslitaleikurinn verður svo á sama stað á laugardag.