Það var mikið um dýrðir í Moskvu í Rússlandi í dag þar drátturinn fyrir riðlakeppni HM næsta sumar fór fram.

Ísland verður í D-riðli í keppninni með Argentínu, Króatíu og Nígeríu. Fyrsti leikur Íslands verður gegn Argentínu í Moskvu þann 16. júní. Annar leikur Íslands verður 22. júní gegn Nígeríu og síðan er lokaleikurinn gegn Króatíu þann 26. júní.

Ísland þekkir Króatíu vel eftir að hafa mætt liðinu í undankeppni HM sem og í umspili um sæti á HM 2014.

Argentína hefur lengi verið með eitt af bestu landsliðum heims en liðið tapaði í úrslitum gegn Þýskalandi á HM 2014.

Í styrkleikaflokki fjögur var Nígería í hæsta sætinu á heimslista FIFA á eftir Serbíu. Nígería er í 41. sæti á heimslistanum, Argentína er í 4. sæti og Króatía í 18. sæti.