Steinunn Sara, Jóna Katrín, Jakob Máni, Valgeir Viðar og Jakob Viðar hittu hollenska markaskorarann Ruud van Nistelrooy í dýragarði á Costa del Sol í nóvember árið 2012. Nistelrooy var mættur til Spánar til að heilsa upp á sína gömlu félaga í Malaga en hann kíkti í dýragarðinn daginn fyrir leik liðsins gegn AC Milan í Meistaradeildinni. Jakob segir frá: ,,Fyrir ekki svo mörgum árum síðan þá hugsaði ég örugglega að ég myndi frekar tækla manndjöfullinn í stað þess að detta á tjatt við kauða ef ég mundi mæta honum á götu! En það kom í ljós að hann fínasti gæji og var meira en lítið til í spjall og voru meira að segja kona hans og börn farin að skoða eitthvað annað þegar við hættum að tala og taka myndir."

Davíð Guðmundsson vann á Hótel Skógum í sumar og fékk mynd af sér með David James þegar markvörðurinn gisti þar á leið sinni til Eyja. Herjólfur gat ekki komist ferða sinna vegna veðurs og því gisti James á Hótel Skógum. ,,Hann gisti í eina nótt hjá okkur, fékk sér Sjávarréttarsalat í kvöldmatinn og hrósaði matnum og gistinguni við brottför," sagði Davíð.

Andri Sveinsson og Daði Ingólfsson yngri, úr Gunnars Majónes fóru á leik Liverpool og Crystal Palace í október. Þeir félagar hittu Raheem Sterling á næturklúbb í Liverpool eftir leik. Gefum Andra orðið: ,,Þvílíkt ferskur náungi sem gaf sér góðan tíma að spjalla við okkur og henti meira að segja nokkrum bröndurum á okkur. Ég henti á móti "Sterling...hefurðu séð Evra?" Daði grét náttúrulega úr hlátri því þessi brandari virkar ekki á ensku!!!"