Óvíst er hvaða hlutverk bíður De Gea á Old Trafford eftir að félagaskipti hans til Real Madrid klúðruðust á ótrúlegan hátt.

De Gea hefur hingað til verið utan hóps hjá Louis van Gaal á meðan Sergio Romero hefur staðið á milli stanganna.

Þrátt fyrir það var De Gea valinn í landsliðshóp Spánar sem undirbýr sig nú fyrir leiki gegn Slóvakíu og Makedóníu í undankeppni EM. Del Bosque segir hins vegar að De Gea verði að spila ætli hann sér að halda sæti sínu í hópnum.

„Ég gæti þurft að tala við De Gea en hann verður að sýna fagmennsku. Ég held að hann muni læra af þessu”.

„Ég vil að hann spili og sé ánægður og til að vera í þessum hópi þarftu að spila vel. Ef þú ert ekki að spila er erfitt að komast í þennan hóp”, sagði Del Bosque.