Um 3000 Íslendingar verða á leiknum annað kvöld en KSÍ skilaði 60 miðum sem ekki fóru í sölu. „Landið er ekki stærra en það að sú sem sér um miðasöluna handfjatlaði hvern einasta miða sem fór út frá okkur. Þeir fóru allir í gegn hjá okkur."

Klara segir að hollenska knattspyrnusambandið hafi gefið íslenskum stuðningsmönnum betri sæti en vanalega.

„Við fengum ekki svæðið sem er vanalega handa gestaliðunum. Við fengum betra svæði sem er til hliðar. Sumum á eftir að bregða þegar það kemur á völlinn og sér hvað þetta er hátt uppi. Það verður rosalega gaman á morgun. Þetta er rosalega bratt og það er eins gott að menn séu sæmilega á tánum og sæmilega allsgáðir."

Klara segist ekki vera byrjuð að hugsa um EM í Frakklandi á næsta ári.

„Við skulum halda okkur á jörðinni og hugsa um einn leik í einu. Það er langt til Frakklands. Við þurfum að byrja á að taka eitt skref á morgun. Það eru fjórir leikir eftir og við þurfum ákveðna hluti þar. Það er ekkert gefins í þessu. Hollendingar geta unnið alla sína leiki og Tékkar einnig. Við tökum einn leik í einu."

Hér að ofan má sjá viðtalið í heild sinni.